தமிழ்நாட்டில் மீண்டும் அதிர்ச்சி..!! பள்ளி மாணவர்கள் குடிக்கும் குடிநீர் தொட்டியில் மலம் கலப்பு..!!

காஞ்சிபுரம் மாவட்டம் திருவந்தவார் பகுதியில் ஊராட்சி ஒன்றிய நடுநிலைப்பள்ளி செயல்பட்டு வருகிறது. இங்கு 90-க்கும் மேற்பட்ட மாணவர்கள் படித்து வருகின்றனர். இந்த மாணவர்கள் பள்ளி வளாகத்தில் உள்ள மினி குடிநீர் தொட்டியைப் பயன்படுத்தி வருகின்றனர். இந்நிலையில், இன்று மதிய உணவு இடைவேளையில் பள்ளி மாணவர்கள் அனைவரும் உணவு அருந்தத் தயாராகியுள்ளனர்.

அப்போது தட்டுகளைக் கழுவுவதற்காகக் குடிநீர் தொட்டிக்குச் சென்றுள்ளனர். குடிநீர் தொட்டியிலிருந்து துர்நாற்றம் அடித்துள்ளது. பின்னர் மாணவர்கள் பள்ளி ஆசிரியர்களிடம் புகார் அளித்துள்ளனர். இதையடுத்து, அங்குச் சென்று பார்த்த பள்ளியின் தலைமை ஆசிரியர் உடனடியாக மாணவர்களைத் தடுத்து நிறுத்தி போலீசாருக்கு தகவல் கொடுத்தார்.

பின்னர் இச்சம்பவம் குறித்துத் தகவலறிந்து வந்த போலீசார், குடிநீர் தொட்டியிலிருந்த குடிநீர் முழுவதையும் வெளியேற்றினர். குடிநீர் முழுவதும் துர்நாற்றம் வீசியுள்ளது. இச்சம்பவம் குறித்து வழக்குப் பதிவு செய்த போலீசார் குடிநீர் தொட்டியில் மலம் கலந்த மர்மநபர்களை தீவிரமாகத் தேடி வருகின்றனர். பள்ளி மாணவர்கள் பயன்படுத்தும் குடிநீர் தொட்டியில் மலம் கலக்கப்பட்ட சம்பவம் பொதுமக்கள் மத்தியில் அதிர்ச்சியை ஏற்படுத்தியுள்ளது.