மும்பை அணிக்கு மீண்டும் கேப்டனாகிறார் ரோகித் ஷர்மா..? ஹர்திக் பாண்ட்யா IPL-இல் இருந்து விலகல்..?

அடுத்த ஆண்டு ஐபிஎல் தொடருக்கு மும்பை இந்தியன்ஸ் அணியின் கேப்டனாக நியமிக்கப்பட்ட ஹர்திக் பாண்ட்யா, தொடரிலிருந்து விலகுவதாக தகவல் வெளியாகியுள்ளது.

மும்பை இந்தியன்ஸ் வாயிலாக ஐபிஎல் தொடருக்கு அறிமுகமான ஹர்திக் பாண்ட்யா, காலப்போக்கில் அணியின் தவிர்க்க முடியாத ஆல்-ரவுண்டராக மாறினார். பல போட்டிகளில் ஒற்றை ஆளாக அணியின் வெற்றிக்காகவும் வித்திட்டுள்ளார். இந்நிலையில் தான், கடந்த 2022ஆம் ஆண்டு அவர் மும்பை அணியால் விடுவிக்கப்பட்டு, குஜராத் அணியுடன் ஒப்பந்தமானார். அணியின் கேப்டனாக நியமிக்கப்பட்ட அவர், முதல் சீசனிலேயே கோப்பையை வென்றதோடு, கடந்த சீசனிலும் இறுதிப்போட்டி வரை அணியை வழிநடத்தினார்.

இந்நிலையில் தான் டிரேட் அடிப்படையில், குஜராத் அணியில் இருந்து மீண்டும் அவர் மும்பை அணிக்கு திரும்பினார். 2024ஆம் ஆண்டு ஐபிஎல் தொடரிலிருந்து மும்பை அணியின் கேப்டனாகவும் நியமிக்கப்பட்டார். இந்நிலையில் தான், காயம் காரணமாக அடுத்த சீசன் முழுவதும் ஹர்திக் பாண்ட்யா விளையாட வாய்ப்பில்லை என்ற தகவல் வெளியாகியுள்ளது. கணுக்காலில் ஏற்பட்ட காயம் காரணமாக உலகக் கோப்பை போட்டியிலிருந்து, ஹர்திக் பாண்ட்யா பாதியிலேயே வெளியேறினார்.

இதன் காரணமாக அண்மையில் நடந்து முடிந்த ஆஸ்திரேலியா மற்றும் தென்னாப்ரிக்கா அணிகளுக்கு எதிரான தொடரில் கூட அவர் இந்திய அணியில் இடம்பெறவில்லை. இந்நிலையில் தான், ஜனவரி மாத தொடக்கத்தில் நடைபெறவுள்ள ஆப்கானிஸ்தான் அணிக்கு எதிரான தொடரிலும் ஹர்திக் பாண்ட்யா விளையாடமாட்டார் என தகவல் வெளியாகியுள்ளது. அதோடு, ஐபிஎல் தொடருக்கு முன்பாக அவர் காயத்திலிருந்து மீண்டு, முழு உடற்தகுதியை பெறுவாரா என்பதும் கேள்விக்குறியாகவே உள்ளது.

இந்நிலையில், அவரது கேப்டன் பொறுப்பை வகித்து வந்த சூர்யகுமார் யாதவும், காயம் காரணமாக ஆப்கானிஸ்தான் அணிக்கு எதிரான தொடரிலிருந்து விலகியுள்ளார். 2024ஆம் ஆண்டு ஜூன் மாதத்தில் டி-20 உலகக்கோப்பை நடைபெறவுள்ள முக்கிய வீரர்கள் காயமடைந்து இருப்பது இந்திய அணி ரசிகர்களிடையே அதிர்ச்சியை ஏற்படுத்தியுள்ளது. கடந்த ஆண்டு நடைபெற்ற உலகக்கோப்பை தோல்விக்கு பிறகு, ரோகித் மற்றும் விராட் கோலி ஆகிய இருவருமே இந்திய டி-20 அணியில் இடம்பெறாதது குறிப்பிடத்தக்கது.