விவசாயிகளுக்கு வழங்கப்படும் பணம் 12,000 ஆக உயர்வு..? மத்திய அரசின் மிகப்பெரிய பரிசு...

விவசாயிகள் தொடர்ந்து போராடி வரும் நிலையில், பிரதம மந்திரி கிசான் சம்மன் யோஜனா திட்டத்தின் கீழ் விவசாயிகளுக்கு வழங்கப்படும் தொகையின் வரம்பை ஆண்டுக்கு ரூ.6000 லிருந்து ரூ.12000 ஆக உயர்த்துமாறு நாடாளுமன்றக் குழு மத்திய அரசுக்கு பரிந்துரைத்துள்ளது. வேளாண் அமைச்சகத்துடன் இணைக்கப்பட்ட நாடாளுமன்றக் குழுவின் தலைவர் சரஞ்சித் சிங் சன்னி தலைமையிலான நிலைக்குழு, தனது பரிந்துரைகளை அரசாங்கத்திற்கு சமர்ப்பித்துள்ளது.

கடந்த மாதம் சரஞ்சித் சிங் சன்னி, வேளாண்மை மற்றும் விவசாயிகள் நல அமைச்சகம் தொடர்பான 18வது மக்களவையின் முதல் மானியக் கோரிக்கையை மக்களவையில் முன்வைத்தார். இந்த அறிக்கையில், வேளாண் நல அமைச்சகத்துடன் இணைக்கப்பட்ட நாடாளுமன்ற நிலைக்குழு, பிரதம மந்திரி கிசான் சம்மன் நிதி யோஜனா திட்டத்தின் கீழ் விவசாயிகளுக்கு வழங்கப்படும் தொகையின் வரம்பை இரட்டிப்பாக்க பரிந்துரைத்துள்ளது. பிரதம மந்திரி கிசான் சம்மன் யோஜனா திட்டத்தின் கீழ் வழங்கப்படும் தொகையின் வரம்பை ஆண்டுதோறும் ரூ.6000 லிருந்து ரூ.12000 ஆக உயர்த்துமாறு குழு பரிந்துரைக்கிறது என்று அறிக்கை கூறுகிறது.

விவசாயிகளுக்கு பட்ஜெட்டில் பரிசு கிடைக்கும்!

பிரதமரின் கிசான் நிதியின் கீழ் விவசாயிகளுக்கு வழங்கப்படும் உதவித் தொகையை அதிகரிக்குமாறு அரசாங்கத்திடம் கேட்கப்படுவது இது முதல் முறை அல்ல. கடந்த பல ஆண்டுகளாக, பட்ஜெட்டுக்கு முந்தைய கூட்டத்தில் விவசாயிகளின் பிரதிநிதிகளும் நிதியமைச்சரிடம் இந்தக் கோரிக்கையை முன்வைத்துள்ளனர். நிதியமைச்சர் நிர்மலா சீதாராமன் 2025-26 ஆம் ஆண்டுக்கான பட்ஜெட்டை பிப்ரவரி 1, 2025 அன்று தாக்கல் செய்ய உள்ளார். நாடாளுமன்றக் குழுவிலிருந்து பெறப்பட்ட பரிந்துரையின் பின்னர், பிரதமரின் கிசான் சம்மான் நிதியின் கீழ் வழங்கப்படும் தொகையின் வரம்பு பட்ஜெட்டில் அதிகரிக்கப்படலாம் என்ற எதிர்பார்ப்பு நிலவி வருகிறது. இதுகுறித்த அறிவிப்பு பட்ஜெட்டில் வெளியாகும் என்பதை பொறுத்திருந்து தான் பார்க்க வேண்டும்.

2024 ஆம் ஆண்டு நடைபெற்ற மக்களவைத் தேர்தலுக்கு முன்பே, பிரதமரின் கிசான் சம்மான் நிதி யோஜனாவின் தொகை அதிகரிக்கப்படும் என்று எதிர்பார்க்கப்பட்டது, ஆனால் அது நடக்கவில்லை. 2019 மக்களவைத் தேர்தலுக்கு முன்பு, பிப்ரவரி 1, 2019 அன்று சமர்ப்பிக்கப்பட்ட பட்ஜெட்டில், அப்போதைய நிதியமைச்சர் பியூஷ் கோயல் பிரதான் மந்திரி கிசான் சம்மான் யோஜனாவை அறிமுகப்படுத்துவதாக அறிவித்திருந்தார். பிரதம மந்திரி கிசான் யோஜனாவின் கீழ், சிறு மற்றும் நடுத்தர விவசாயிகளுக்கு ஆண்டுதோறும் மூன்று தவணைகளில் ரூ.6000 வழங்கப்படுகிறது. இந்த திட்டத்தின் கீழ், நேரடி பரிமாற்றத்தின் மூலம் விவசாயிகளின் வங்கிக் கணக்குகளுக்கு பணம் மாற்றப்படுகிறது. இதுவரை, 18 தவணைகளில் ரூ.3.45 லட்சம் கோடி விவசாயிகளின் வங்கிக் கணக்குகளுக்கு மாற்றப்பட்டுள்ளது என்பது குறிப்பிடத்தக்கது.

Read More : இனி வாரத்தில் 3 நாட்கள் லீவு… ஆனா ஒரு ட்விஸ்ட்..! ஊழியர்களுக்கு பட்ஜெட்டில் வரப்போகும் முக்கிய அறிவிப்பு..