தமிழகத்தில் இரவோடு இரவாக 6 ஐ.ஏ.எஸ் அதிகாரிகள் அதிரடி மாற்றம்...!

தமிழகத்தில் 6 ஐ.ஏ.எஸ் அதிகாரிகளை பணியிட மாற்றம் செய்து தமிழக அரசு உத்தரவிட்டுள்ளது.

தமிழகத்தில் 6 ஐ.ஏ.எஸ் அதிகாரிகளை பணியிட மாற்றம் செய்து தமிழக அரசு உத்தரவிட்டுள்ளது. அதன் படி, தமிழ்நாடு நகர்ப்புற வாழ்விட மேம்பாட்டு வாரியத்தின் இணை நிர்வாக இயக்குநராகவும், திட்ட இயக்குநராகவும் (உலக வங்கி மற்றும் ஆசிய வளர்ச்சி வங்கி) எம். பிரதாப்பிற்குப் பதிலாக கே. விஜயகார்த்திகேயனை மாநில அரசு நியமித்தது. மாநில மனித உரிமைகள் ஆணையத்தின் தற்போதைய செயலாளராகவும் அவர் நீடிப்பார்.

பிரதாப் சிறப்புத் திட்ட அமலாக்கத் துறையின் துணைச் செயலாளராக நியமிக்கப்பட்டுள்ளார். டி.ரத்னாவுக்கு பதிலாக ஜெ.ஜெயகாந்தன் மாற்றப்பட்டு மதுவிலக்கு மற்றும் ஆயத்தீர்வை ஆணையராக நியமிக்கப்பட்டுள்ளார். ஊரக வளர்ச்சி மற்றும் பஞ்சாயத்து ராஜ் இணைச் செயலாளராக திரு.ஜெயகாந்தனிடம் இருந்து திருமதி.ரத்னா பொறுப்பேற்றுள்ளார்.

கோவை, வணிகவரி மற்றும் மாநில வரிகள் இணை ஆணையராக இருந்த பி.காயத்திரி கிருஷ்ணன், கவிதா ராமுவுக்குப் பதிலாக, சென்னை பெருநகர வளர்ச்சிக் குழுமத்தின் முதன்மை நிர்வாக அதிகாரியாக நியமிக்கப்பட்டுள்ளார். தமிழ்நாடு மகளிர் மேம்பாட்டுக் கழகத்தின் செயல் இயக்குநராக பி.பிரியங்காவுக்குப் பதிலாக, கூடுதல் வேளாண் இயக்குனராக இருந்த ஸ்ரேயா பி.சிங் நியமிக்கப்பட்டுள்ளார்.