தொடரும் வன்கொடுமை..!! கோயிலில் வைத்து 18 மாத குழந்தைக்கு 44 வயது நபர் பாலியல் தொல்லை..!!
வாரணாசியில் 18 மாத குழந்தைக்கு, பாலியல் தொல்லை கொடுக்கப்பட்ட சம்பவம் அதிர்ச்சியை ஏற்படுத்தியுள்ளது.
உத்தரப்பிரதேச மாநிலம் வாரணாசியின் ஜன்சா பகுதியில் உள்ள கிராமத்தில், கோயிலில் 18 மாத கைக்குழந்தையை பாலியல் பலாத்காரம் செய்ததாக 44 வயது நபர் கைது செய்யப்பட்டுள்ளார். தி டைம்ஸ் ஆஃப் இந்தியா செய்தியின்படி, இச்சம்பவம் குறித்து போலீசுக்கு தகவல் கிடைத்தவுடன் வழக்குப்பதிவு செய்யப்பட்டது.
குற்றம் சாட்டப்பட்டவர் திலீப் குமார் துபே என்பது தெரியவந்தது. தற்போது அவர் கைது செய்யப்பட்டு சிறையில் அடைக்கப்பட்டுள்ளார். இந்த வழக்கில் குற்றவாளிக்கு விரைந்து தண்டனை பெற்றுத்தர அனைத்து நடவடிக்கைகளும் எடுத்து வருவதாக காவல்துறை தெரிவித்துள்ளது.
அண்மையில் தான், அயோத்தியில் 4 வயது தலித் சிறுமியை பலாத்காரம் செய்ததாக முகமது சல்மான் என்பவரை காவல்துறை சுட்டுப் பிடித்தது. என்கவுன்டரின் போது சல்மான் காலில் சுடப்பட்டார். இதையடுத்து, குற்றம் சாட்டப்பட்டவர் மற்றும் பாதிக்கப்பட்ட சிறுமி ஆகிய இருவரும் மருத்துவமனையில் சிகிச்சை பெற்று வருகின்றனர்.
அதேபோல், ஒடிசா மாநிலத்தில் 9 வயது பழங்குடியின சிறுமியை பலாத்காரம் செய்து கொன்ற வழக்கில் 46 வயது நபர் கைது செய்யப்பட்டார். ஆகஸ்ட் 27ஆம் தேதி முதல் காணாமல் போன சிறுமி, ஆகஸ்ட் 30ஆம் தேதி ஒரு கைவிடப்பட்ட வீட்டில் சடலமாக மீட்கப்பட்டார். இந்த வழக்கில் ரபி சிங் என்பவர் கைது செய்யப்பட்டு நீதிமன்ற காவலில் சிறையில் அடைக்கப்பட்டுள்ளார்.
விசாரணையில், குற்றம் சாட்டப்பட்டவர் பாதிக்கப்பட்ட சிறுமியின் தந்தையின் நண்பர் என்பதும், குற்றம் நடந்த நாளுக்கு முன்பு அவர் வீட்டில் தூங்கியதும் தெரியவந்தது. மறுநாள் காலை சிற்றுண்டிக்காக குழந்தையை வெளியே அழைத்துச் சென்று ஒரு கைவிடப்பட்ட வீட்டில் வைத்து பலாத்காரம் செய்து கொலை செய்ததும் தெரியவந்தது.