இந்தியாவில் மீண்டும் ஜிகா வைரஸ் பீதி!. நெல்லூரில் 6 வயது சிறுவன் பாதிப்பு!. சென்னையில் சிகிச்சை!
Zika virus: ஆந்திராவின் நெல்லூர் மாவட்டத்தில் 6 வயது சிறுவனுக்கு உடல்நலக் குறைவு ஏற்பட்டதையடுத்து, ஜிகா வைரஸ் சந்தேகத்தின்பேரில் சென்னையில் சிகிச்சை அளிக்கப்பட்டு வருகிறது.
ஜிகா வைரஸ் இந்தியாவில் அவ்வப்போது பரவிவருகிறது. அதன்படி, தென்னிந்திய மாநிலமான ஆந்திரப் பிரதேசத்தின் நெல்லூர் மாவட்டம் மரிபாடு மண்டலம் வெங்கடாபுரம் கிராமத்தைச் சேர்ந்த 6 வயது சிறுவனுக்கு உடல்நலக் குறைவு ஏற்பட்டது. இதையடுத்து, அவரது குடும்பத்தினர் நெல்லூரில் உள்ள தனியார் மருத்துவமனைக்கு அழைத்துச் சென்றனர். அவரை பரிசோதித்த மருத்துவர்கள் சிறுவனுக்கு ஜிகா வைரஸ் அறிகுறிகள் சந்தேகிப்பதாக தெரிவித்தனர்.
இதையடுத்து, மருத்துவர்களின் ஆலோசனையின் பேரில் சிறுவனுக்கு சென்னையில் உள்ள தனியார் மருத்துவமனையில் அனுமதித்து சிகிச்சை அளிக்கப்பட்டு வருகிறது. ஜிகா வைரஸ் சந்தேகம் எழுந்ததையடுத்து, மாவட்ட மருத்துவம் மற்றும் சுகாதாரத் துறை வெங்கடாபுரம் கிராமத்தில் மருத்துவ முகாம் அமைத்து முன்னெச்சரிக்கை நடவடிக்கைகளை மேற்கொண்டுள்ளது.
கிராம மக்களுக்கு வைரஸ் காய்ச்சல் குறித்து விழிப்புணர்வு ஏற்படுத்தப்பட்டு, அவர்களுக்கு தேவையான மருந்துகள் மற்றும் சிகிச்சை அளிக்கப்பட்டு வருகிறது. ஜிகா வைரஸ் பரவாமல் தடுக்க தேவையான அனைத்து முன்னெச்சரிக்கை நடவடிக்கைகளையும் எடுத்து வருவதாக மருத்துவ மற்றும் சுகாதார துறை அதிகாரிகள் தெரிவித்துள்ளனர்.
நெல்லூர் மாவட்டத்தில் ஜிகா வைரஸ் பாதிப்பு குறித்து ஆந்திர அமைச்சர் அனம் ராமநாராயண ரெட்டி கூறுகையில், மரிபாடு கிராமத்தைச் சேர்ந்த சிறுவன் ஏற்கனவே சென்னைக்கு மாற்றப்பட்டான். வைரஸ் அறிகுறி உள்ள சிறுவனுக்கு சிறந்த சிகிச்சை அளிக்க ஏற்பாடு செய்யப்பட்டுள்ளது. மேலும், சிறப்பு மருத்துவக் குழுவினர் கிராமத்திற்குச் சென்று அங்குள்ள மக்களுக்கு மருத்துவப் பரிசோதனை செய்ததாகவும் அவர் கூறினார். அரசு தேவையான அனைத்து நடவடிக்கைகளையும் எடுக்கும், யாரும் அச்சப்பட தேவையில்லை," என்றார்.
