தமிழகத்தின் இந்த மாவட்டத்திற்கு நாளை பள்ளிகளுக்கு விடுமுறை..!

சென்னையில் பெய்து வரும் மழை காரணமாக, பள்ளிகளுக்கு மட்டும் நாளை விடுமுறை அளிக்கப்பட்டுள்ளது.

தென்கிழக்கு வங்கக்கடல் பகுதிகளில் நிலவும் ஆழ்ந்த காற்றழுத்த தாழ்வுப் பகுதி காரணமாக சென்னை மற்றும் புறநகர் பகுதிகளில் காலை முதலே தொடர்ந்து மழை பெய்து வருகிறது. மாலை முதல் பெய்து வரும் தொடர் மழை காரணமாக சென்னையில் முக்கியமான சாலைகளில் போக்குவரத்து நெரிசல் இருப்பதால் வாகன ஓட்டிகள் அவதிக்குள்ளாகினர்.

சென்னை உள்ளிட்ட 4 மாவட்டங்களுக்கு மிக கனமழைக்கு வாய்ப்பு இருப்பதாக சென்னை வானிலை ஆய்வு மையம் தெரிவித்துள்ளது. இந்நிலையில் கனமழை காரணமாக சென்னையில் நாளை (30.11.2023) பள்ளிகளுக்கு மட்டும் விடுமுறை அறிவித்து மாவட்ட ஆட்சியர் உத்தரவிட்டுள்ளார். அதேபோல விழுப்புரம் மற்றும் காஞ்சிபுரம் மாவட்டங்களில் மழை நீடிக்கும் பட்சத்தில் விடுமுறை அளிப்பது குறித்து முடிவு எடுக்கப்படும் என தெரிவிக்கப்பட்டுள்ளது.

தொடர் மழை காரணமாக மக்களுக்கு தேவையான அனைத்து உதவிகளையும் செய்ய வேண்டும் என அமைச்சர்களுக்கு, முதலமைச்சர் மு.க.ஸ்டாலின் உத்தரவிட்டுள்ளார். மேலும் அமைச்சர்கள், எம்எல்ஏக்கள், உள்ளாட்சி பிரதிநிதிகள் உடனடியாக களத்துக்குச் சென்று பணியாற்ற வேண்டும் எனவும் மு.க.ஸ்டாலின் உத்தரவிட்டுள்ளார்.