கனத்த இதயத்தோடும், கலங்கிய கண்களோடும் அந்த சில நொடிகள்!… விஜயகாந்த் உடலுக்கு நடிகர் விஜய் நேரில் அஞ்சலி!

நடிகரும், தேமுதிக நிறுவனருமான விஜயகாந்த் நேற்று உடல்நலக்குறைவால் உயிரிழந்தார். அவரது உடலுக்கு நடிகர் விஜய் நேரில் வந்து தனது அஞ்சலியை செலுத்தி கலங்கியபடி நின்றார்.

உடல்நல குறைவு காரணமாக சிகிச்சை பெற்றுவந்த தேமுதிக நிறுவன கேப்டன் விஜயகாந்த், நேற்று காலை மண்ணுலகைவிட்டு விண்ணுலகம் சென்றார். இதையடுத்து, தேமுதிக தலைமை அலுவலகத்தில் வைக்கப்பட்டிருந்த அவரது உடலுக்கு அரசியல் தலைவர்கள், தொண்டர்கள், திரையுலக பிரபலங்கள் பலரும் நேரில் வந்து கண்ணீர் அஞ்சலி செலுத்தினர். அந்தவகையில் நடிகர் விஜய்யும் நள்ளிரவு நேரில் விஜயகாந்துக்கு தனது இறுதி அஞ்சலியை செலுத்தினார். உச்சக்கட்ட சோகத்தோடு வந்த விஜய்; விஜயகாந்த்தின் உடலை சில நொடிகள் பார்த்தபடியே நின்றார். அப்போது அவரது கண்கள் கலங்கியிருந்தன. மேலும் பிரேமலதாவுக்கும், விஜயகாந்த்தின் மகன்களுக்கும் தனது ஆறுதலை சொல்லிவிட்டு சென்றார்.

விஜய் கரியரை ஆரம்பித்தபோது அவரது வளர்ச்சிக்காக விஜயகாந்த் செந்தூரப்பாண்டி படத்தில் நடித்துக்கொடுத்தார். விஜயகாந்த் உடல்நிலை சரியில்லாதபோது விஜய் நேரில் சென்று சந்திக்கவில்லை என்ற விமர்சனம் எழுந்தது. அதுமட்டுமின்றி விஜயகாந்த்தின் இறப்புக்கு விஜய் வருவாரா என்ற சந்தேகத்தையும் ஒரு சிலர் எழுப்பினர். ஆனால் தான் ஒன்றும் நன்றி மறந்தவன் இல்லை என்பதை இதன் மூலம் விஜய் உணர்த்தியிருக்கிறார். விஜய் கலங்கி நின்றதை பார்த்த ரசிகர்களும் கலங்கினர்.