புதுக்கோட்டையில் அதிர்ச்சி..!! பட்டாசு தயாரிப்பு ஆலையில் வெடிவிபத்து..!! நடந்தது என்ன..?

புதுக்கோட்டை மாவட்டம் கோவில்பட்டி அடப்பன் வயல் அருகே உள்ள கல்லுப்பட்டறை பகுதியில் மூர்த்தி என்பவரது வாணப்பட்டறை செயல்பட்டு வருகிறது. இதில், இன்று காலை தீவிபத்து ஏற்பட்டு வெடி பொருட்கள் வெடித்து சிதறின. இந்த விபத்தில் கட்டடம் தரைமட்டமானது. மேலும், அதில் இருந்த பொருட்கள் அனைத்தும் எரிந்து சாம்பலானது. இதில் உரிமையாளர் மூர்த்தி என்பவருக்கு மட்டும் காயம் ஏற்பட்டு மருத்துவமனையில் சிகிச்சைக்காக அனுமதிக்கப்பட்டுள்ளார்.

இந்த தீ விபத்து சம்பந்தமாக திருக்கோகர்ணம் காவல்துறையினர் வழக்குப்பதிவு செய்து விசாரணை நடத்தி வருகின்றனர். இதுகுறித்து, தகவல் அறிந்த புதுக்கோட்டை எம்எல்ஏ முத்துராஜா உடனடியாக அப்பகுதிக்கு விரைந்து சென்று தீயணைப்பு பணிகளை பார்வையிட்டார். இந்த தீ விபத்தில் காயமடைந்த மூர்த்தி புதுக்கோட்டை அரசு மருத்துவக் கல்லூரி மருத்துவமனையில் அனுமதிக்கப்பட்டு சிகிச்சை பெற்று வருகிறார். அந்த பட்டாசு தயாரிப்பு கூடத்தில் பணி செய்யும் தொழிலாளர்கள் இன்று காலை தாமதமாக பணிக்கு வந்துள்ளனர். அதனால், பெரும் உயிர் சேதம் தவிர்க்கப்பட்டுள்ளது.