உன் சான்றிதழ்கள் எங்கிட்ட தான் இருக்கு.. வீட்டுக்கு வா..!! இளம்பெண்ணை பலாத்காரம் செய்ய முயன்ற பேராசிரியர்.. கடைசியில் நடந்த ட்விஸ்ட்!!
கோவையில் இளம்பெண்ணை பலாத்காரம் செய்ய முயன்ற கல்லூரி பேராசிரியரை போலீசார் கைது செய்தனர். திருப்பூர் மாவட்டத்தை சேர்ந்தவர் 25 வயதான இளம்பெண். இவர் கோவையில் கல்லூரிப் படிப்பை முடித்துள்ளார். எம்எஸ்சி பட்டதாரியான இவர் கோவையில் தங்கி தனியார் நிறுவனத்தில் வேலை பார்த்து வந்துள்ளார். வேலையில் சேரும்போது நிறுவனத்தினர் கேட்டதையடுத்து அந்தப் பெண் தனது கல்விச் சான்றிதழ்கள் அனைத்தையும் அந்த நிறுவனத்தில் வழங்கியுள்ளார். பின்னர், அந்த வேலையை விட்டு நின்றுள்ளார்.
வேலையை விட்டு நின்ற பின்னர் இளம்பெண்ணின் சான்றிதழ்களை அந்த நிறுவனத்தினர் கொடுக்க மறுத்ததாகக் கூறப்படுகிறது. இதையடுத்து, அவர் தான் கோவையில் கல்லூரியில் படிக்கும் போது தனக்கு வகுப்பு எடுத்த கல்வீரம்பாளையம், முருகன் நகர் நேரு தெருவைச் சேர்ந்த பேராசிரியர் சிவப்பிரகாசம் (45) என்பவரின் உதவியை கோரியுள்ளார்.
தன்னுடைய சான்றிதழ்களை நிறுவனத்திடம் இருந்து வாங்கித் தர உதவி செய்யுமாறு கேட்டுள்ளார். இதையடுத்து, சில நாட்களுக்கு முன்பு இளம்பெண்ணை சிவப்பிரகாசம் போனில் தொடர்பு கொண்டுள்ளார். அப்போது, உனது சான்றிதழ்கள் அனைத்தையும் வாங்கி வைத்துள்ளேன். வேறொரு நிறுவனத்தில் வேலை வாங்கித் தருகிறேன். நீ கோவைக்கு வா என்று அழைத்துள்ளார்.
சிவப்பிரகாசம் சொல்வதை நம்பிய இளம்பெண் நேற்று சிவப்பிரகாசம் வீட்டுக்குச் சென்றுள்ளார். வீட்டில் சிவப்பிரகாசம் மட்டுமே இருந்துள்ளார். இருவரும் சிறிது நேரம் பேசிக் கொண்டிருந்துள்ளனர். அப்போது, பேராசிரியர் சிவப்பிரகாசம் திடீரென இளம்பெண்ணை பாலியல் பலாத்காரம் செய்ய முயன்றுள்ளார். இதை சற்றும் எதிர்பாராத அந்தப் பெண் அவரது பிடியில் இருந்து தப்பி வீட்டின் குளியலறைக்குள் புகுந்துள்ளார்.
பின்னர் செல்போனில் தோழி ஒருவரை தொடர்புகொண்டு, ‘லொக்கேஷன்’ அனுப்பினார். அவரது தோழி துரிதமாக செயல்பட்டு அதனை போலீஸ் கட்டுப்பாட்டு அறைக்கு அனுப்பி விவரம் தெரிவித்தார். இதையடுத்து வடவள்ளி போலீசார் ‘லொக்கேஷன்’ உதவியுடன் மாணவி இருக்கும் வீட்டுக்கு சென்று குளியலறையில் இருந்த இளம்பெண்ணை மீட்டனர். கல்லூரி பேராசிரியர் சிவப்பிரகாசத்தை கைது செய்து, கோவை மேற்கு அனைத்து மகளிர் போலீஸ் ஸ்டேஷனில் ஒப்படைத்தனர். தொடர்ந்து அவரிடம் விசாரணை நடந்து வருகிறது. இந்த சம்பவம் கோவையில் பரபரப்பை ஏற்படுத்தியுள்ளது.