"ஒரே நாடு ஒரே தேர்தல்" 10 நாள் இடைவெளியில் தேர்தல் நடத்தலாம்..!

ஒரே நாடு ஒரே தேர்தலை 10 நாட்கள் இடைவெளியில் நடத்தி முடிக்கலாம் என முன்னாள் குடியரசுத் தலைவர் ராம் நாத் கோவிந்த அளித்த அறிக்கையில் பரிந்துரைக்கப்பட்டுள்ளது.

ஒரே நாடு, ஒரே தேர்தல் தொடர்பாக ராம்நாத் கோவிந்த் தலைமையிலான உயர்மட்ட குழு, 18,626 பக்கங்களைக் கொண்ட அறிக்கையை குடியரசுத் தலைவர் திரௌபதி முர்முவிடம் சமர்ப்பித்துள்ளது. இதில் முதல் கட்டமாக நாடாளுமன்றம், சட்டமன்றங்களுக்கு ஒரே நேரத்தில் (10 நாட்கள் இடைவெளியில்) தேர்தல் நடத்தலாம் என்றும், அதிக மனிதவளம் மற்றும் உபகரணங்கள் தேவைப்படுவதால் அடுத்த 100 நாட்களுக்குள் நாடு முழுவதும் உள்ளாட்சி தேர்தலை நடத்தலாம் என்றும் அதில் பரிந்துரைக்கப்பட்டுள்ளது.

ஒரே நாடு ஒரே தேர்தல் மூலம் தேர்தல்களை ஒருங்கிணைப்பது, பொருளாதாரம் மற்றும் சமூகத்தை அடிக்கடி தேர்தல்களால் ஏற்படும் இடையூறுகளில் இருந்து காப்பாற்ற உதவும் என்று தெரிவிக்கப்பட்டுள்ளது. மத்திய உள்துறை அமைச்சர் அமித் ஷா, மத்திய சட்ட அமைச்சர் அர்ஜுன் ராம் மேக்வால், ஜனநாயக முற்போக்கு ஆசாத் கட்சி (டிபிஏபி) தலைவர் குலாம் நபி ஆசாத் மற்றும் பிற உறுப்பினர்கள் அடங்கிய குழு, தனது அறிக்கையை அனைத்து உறுப்பினர்கள் முன்னிலையில் ஜனாதிபதி திரௌபதி முர்முவிடம் சமர்ப்பித்தது. சமீபத்தில், பாஜக, திரிணாமுல் காங்கிரஸ், சமாஜ்வாடி, சிபிஐ, சிபிஐ(எம்), ஏஐஎம்ஐஎம், ஆர்பிஐ, அப்னா தளம் உள்ளிட்ட பல்வேறு அரசியல் கட்சிகளின் பிரதிநிதிகளையும் இந்தக் குழு சந்தித்து உரையாடியது, அவர்கள் எழுத்துப்பூர்வமாக தங்கள் ஆலோசனைகளை வழங்கினர்.

'ஒரு நாடு, ஒரே தேர்தல்' என்ற சாத்தியக்கூறுகளை ஆராய்ந்து, நாடு முழுவதும் ஒரே நேரத்தில் தேர்தல் நடத்துவதற்கான பரிந்துரைகளை மத்திய அரசு கடந்த ஆண்டு செப்டம்பரில் நிறுவியது. லோக்சபா மற்றும் மாநில சட்டசபை தேர்தல்களை அனைத்து மாநிலங்களிலும் நடத்துவதே இந்த முன்முயற்சியின் முக்கிய நோக்கமாகும்,

இந்தியாவில் கடந்த, 1967ம் ஆண்டு வரை மக்களவைக்கும், மாநில சட்டமன்றங்களுக்கும் ஒரே நேரத்தில்தான் பொதுத்தேர்தல் நடத்தப்பட்டு வந்தது. புதிய மாநிலங்கள் உருவாக்கம், அரசாங்கக் கலைப்பு போன்ற காரணங்களால் தேர்தல்களின் சுழற்சியில் பல மாற்றங்கள் நிகழ்ந்தன. இப்போது ஆந்திரப் பிரதேசம், சிக்கிம் உள்ளிட்ட சில மாநிலங்களில் மட்டுமே சட்டமன்றத் தேர்தல் மக்களவைத் தேர்தலுடன் சேர்த்து நடத்தப்படுகிறது.

Read More: தமிழ்நாட்டில் கோபி மஞ்சூரியனுக்கு தடையில்லை..! அமைச்சர் மா.சுப்பிரமணியன் தகவல்