நோட்!. நாளையுடன் முடிவடையும் காலக்கெடு!. டிச.1 முதல் முக்கிய மாற்றங்கள் இதோ!.
Major Changes: நவம்பர் மாதம் நாளையுடன் முடிவடையவுள்ளதால், சில விதிமுறைகளின் காலக்கெடுவும் முடிவடையவுள்ளது. அதன்படி, டிசம்பர் 1 முதல் பல்வேறு விதிமுறைகளில் மாற்றம் செய்யப்பட்டுள்ளது. அந்த வகையில் டிசம்பர் 1 முதல் பல்வேறு விதிமுறை மாற்றங்கள் இந்தியாவில் வருகின்றன. போலி OTPகளைக் கட்டுப்படுத்துவதற்கான மாற்றங்கள், மாலத்தீவு சுற்றுலா விதிகளில் மாற்றங்கள் மற்றும் சில வங்கிகள் தங்கள் கிரெடிட் கார்டு விதிமுறைகளை மேம்படுத்துதல் ஆகியவை இதில் அடங்கும்.
மோசடி செய்பவர்களுக்கு மக்களின் சாதனங்களை அணுகக்கூடிய மற்றும் பெரிய நிதி இழப்புகளை ஏற்படுத்தக்கூடிய சந்தேகத்திற்குரிய OTPகளைக் கட்டுப்படுத்தும் முயற்சியில் இந்திய தொலைத்தொடர்பு ஒழுங்குமுறை ஆணையம் (TRAI) தொலைத்தொடர்பு நிறுவனங்களைச் செய்திகளைக் கண்டறியுமாறு கேட்டுக் கொண்டுள்ளது. இந்த உத்தரவுக்கு இணங்குவதற்கான காலக்கெடு நவம்பர் 30 ஆகும்.
அதன்படி, டிசம்பர் 1 முதல் அனைத்து தொலைத்தொடர்பு நிறுவனங்களும் வணிக செய்திகள் மற்றும் OTP (ஒன் டைம் பாஸ்வேர்ட்) செய்திகளை கண்காணிக்க வேண்டும் என உத்தரவிடப்பட்டுள்ளது. இதன் மூலம் ஸ்பேம் எஸ்எம்எஸ் மற்றும் ஃபிஷிங் மோசடிகளை தடுக்க முடியும் என எதிர்பார்க்கப்படுகிறது. ஆனால் ஓடிபி கிடைப்பதில் தாமதம் ஏற்படாலம்.
டிசம்பர் 1 முதல் அனைத்து OTP களும் கண்காணிக்கப்படும். இதனால் OTP பெறுவதில் சிறிது தாமதம் ஏற்படலாம். போலி OTP களை பயன்படுத்தி மோசடி செய்வதை தடுக்க இந்த நடவடிக்கை உதவும். ஒவ்வொரு மெசேஜும் எங்கேயிருந்து வருகிறது என்ற மூலத்தையும் கண்காணிப்பதன் மூலம் பயனர்களின் பாதுகாப்பு அதிகரிக்கும்.
மத்திய அல்லது மாநில அரசு ஊழியராக இருந்தால், ஓய்வூதியம் பெற உங்களுடைய ஆயுள் சான்றிதழை சமர்ப்பிக்க வேண்டும். நீங்கள் இதைச் செய்யாவிட்டால் உங்கள் கணக்கில் ஓய்வூதியம் வராமல் போகலாம். சூப்பர் சீனியர் சிட்டிசன்கள், அதாவது 80 வயதுக்கு மேற்பட்டவர்கள், அக்டோபர் 1 முதல் நவம்பர் 30 வரை சமர்ப்பிக்க வேண்டும். 60 முதல் 80 வயதுக்குட்பட்டவர்கள் நவம்பர் 30ஆம் தேதிக்குள் சமர்ப்பிக்க வேண்டும்.
சிலிண்டர் விலை ஒவ்வொரு மாதமும் முதல் தேதியில் மாற்றப்படுகிறது. எண்ணெய் சந்தைப்படுத்தும் நிறுவனங்கள் ஒவ்வொரு மாதமும் 1 ஆம் தேதி சிலிண்டர்களின் விலையை மாற்றியமைக்கின்றன. கடந்த மாதம் பெட்ரோலியநிறுவனங்கள் 19 கிலோ எடை கொண்ட வணிக பயன்பாட்டு சிலிண்டரின் விலையை 48 ரூபாய் உயர்த்தின. அதே நேரத்தில் உள்நாட்டு எரிவாயு சிலிண்டர்களின் விலையில் எந்த மாற்றமும் இல்லை.
மாலத்தீவு, சுற்றுலாப் பயணிகளிடம் வசூலிக்கும் கட்டணத்தை உயர்த்துகிறது. பொருளாதார வகுப்பு பயணிகளுக்கு, கட்டணம் 30 டாலரில் (ரூ. 2,532) இருந்து 50 டாலராக (ரூ. 4,220) உயர்த்துகிறது. அதேபோல வணிக வகுப்பு பயணிகள் 60 டாலரில் (ரூ. 5,064) இருந்து 120 டாலராகவும் (ரூ. 10,129) உயருகிறது. முதல் வகுப்பு பயணிகள் 240 டாலர் (ரூ. 20,257) செலுத்த வேண்டியிருக்கும்.
டிசம்பர் 1ஆம் தேதி முதல் யெஸ் வங்கி தனது கிரெடிட் கார்டில் விமானங்கள் மற்றும் ஹோட்டல்களுக்கு ரிவார்டு புள்ளிகளில் மாற்றங்களைச் செய்துள்ளது. HDFC வங்கி அதன் Regalia கிரெடிட் கார்டின் பயனர்களுக்கான லவுஞ்ச் அணுகல் விதிகளையும் மாற்றுகிறது. புதிய விதிகளின்படி, டிசம்பர் 1 முதல் லவுஞ்ச் அணுகலுக்குத் தகுதிபெற பயனர்கள் ஒவ்வொரு காலாண்டிலும் ரூ. 1 லட்சம் செலவழிக்க வேண்டும். அதேபோல், ஸ்டேட் பாங்க் ஆஃப் இந்தியா மற்றும் ஆக்சிஸ் வங்கியும் அதன் பல்வேறு பயனர்களுக்கான வெகுமதி புள்ளி விதிகள் மற்றும் கிரெடிட் கார்டு கட்டணங்களைத் திருத்தியுள்ளன.
