"இது முடிவல்ல புதிய தொடக்கம்" - பாஜகவில் இணைந்த பின் சரத்குமார் வெளியிட்ட அறிக்கை.!
தமிழ் சினிமாவின் முன்னணி நடிகர்களில் ஒருவரான சரத்குமார் சமத்துவ மக்கள் கட்சியை நிறுவி அந்தக் கட்சியின் பொதுச் செயலாளராக பணியாற்றி வந்தார். இந்நிலையில் 2024 ஆம் வருட பாராளுமன்ற தேர்தலுக்கு முன்பாக தனது சமத்துவ மக்கள் கட்சியை பாஜகவுடன் இணைத்ததாக நேற்று அறிவித்தார்.
பாரதிய ஜனதா கட்சியுடன் கூட்டணி பேச்சுவார்த்தை நடத்தி வந்த நிலையில் தனது கட்சியை பாஜகவுடன் இணைத்திருப்பது அரசியல் வட்டாரங்களில் பரபரப்பை ஏற்படுத்தியது. அவர் பாஜக உடன் இணைந்ததற்கு பல்வேறு தரப்பினரும் பல்வேறு விதமான காரணங்களை முன்வைத்து வந்தனர். இந்நிலையில் நடிகர் சரத்குமார் பாஜகவில் இணைந்ததற்கான காரணத்தை தனது அறிக்கையின் மூலம் தெரிவித்திருக்கிறார்.
சமத்துவ மக்கள் கட்சியை பாஜக உடன் இணைத்த பின்னர் சரத்குமார் வெளியிட்டுள்ள அறிக்கையில் "அரசியலில் நினைத்த இலக்கை அடைய முடியவில்லை என்ற என்னுடைய சிந்தனைக்கு இந்தத் தேர்தல் ஞானத்தின் உதயமாக அமைந்திருக்கிறது" என அவர் தெரிவித்துள்ளார். மேலும் "ஜனநாயகம் குறைந்து பணநாயகத்தின் கை மேலோங்கிய இந்த சூழலில் என்னுடைய நினைத்த இலக்கை அடைய முடியவில்லை".
"இது என் முடிவல்ல வருங்கால எழுச்சியின் தொடக்கம் மீண்டும் ஒருமுறை மக்கள் பணியில் என்னை அர்ப்பணித்துக் கொள்கிறேன்" என அவர் வெளியிட்டுள்ள அறிக்கையில் தெரிவித்துள்ளார். திராவிட முன்னேற்றக் கழகத்தின் மூலம் அரசியலில் அறிமுகமான சரத்குமார் சிறிது காலம் அதிமுகவில் பயணம் செய்த பின்பு சமத்துவ மக்கள் கட்சி என்ற தனிக் கட்சியை விரும்பினார் என்பது குறிப்பிடத்தக்கது. தற்போது தனது கட்சியை அவர் பாஜகவுடன் இணைத்திருக்கிறார்.