முஸ்லிம்கள் வெளியேறவேண்டும்!... இல்லையென்றால் கொல்லப்படுவார்கள்!… பாஜக தலைவர் எச்சரிக்கை..!

ராமர் கோவில் நிலத்தில் கட்டப்பட்டிருக்கும் மசூதிகளில் இருந்து முஸ்லிம்கள் அவர்களாக வெளியேறாவிட்டால் எத்தனை பேர் கொல்லப்படுவார்கள் என்று எங்களுக்குத் தெரியாது என கர்நாடகாவைச் சேர்ந்த முன்னாள் அமைச்சர் கே.எஸ்.ஈஸ்வரப்பா பேசியிருப்பது பெரும் அதிர்ச்சியை ஏற்படுத்தியுள்ளது.

பாபர் மசூதி, ராமர் கோவில் இடத்தில்தான் கட்டப்பட்டிருந்தது என்கிற சர்ச்சை இந்திய அரசியலில் பெரும் கலவரத்திற்கு வித்திட்டது. வெகுகாலம் நீடித்த இந்த சர்ச்சையின் விளைவாக 1992ல் பாபர் மசூதி இடிக்கப்பட்டது. அதன் பிறகான கலவரங்களில் ஏராளமானவர்கள் கொல்லப்பட்டனர். பிறகு அது குறித்த வழக்குகள் நடந்து 2019ல் தான் ஒரு முடிவு ஏற்பட்டது. அங்கு ராமர் கோவில் கட்டலாம் என உச்சநீதிமன்றம் தீர்ப்புக்குப் பிறகு முடிவெடுக்கப்பட்டு ராமர் கோயில் கட்டப்பட்டுள்ளது.

இந்த நிலையில், கர்நாடக முன்னாள் அமைச்சர் கே.எஸ்.ஈஸ்வரப்பா, நாட்டில் மீண்டும் மதக் கலவரத்தை தூண்டும் வகையில் பேசியிருப்பது பெரும் அதிர்ச்சியை ஏற்படுத்தியுள்ளது. பெலகாவியில் நடந்த இந்து ஊழியர் மாநாட்டில் பேசிய பா.ஜ.க தலைவர் கே.எஸ்.ஈஸ்வரப்பா, "மதுரா உட்பட மேலும் இரண்டு இடங்கள் பரிசீலனையில் இருக்கின்றன. நீதிமன்ற தீர்ப்பு வந்ததும், இன்றைக்கோ, நாளைக்கோ கோவில்கள் கட்டும் பணியில் நாங்கள் ஈடுபடுவோம். அதில், எந்த சந்தேகமும் வேண்டாம்.

இதுபோன்று மசூதிகள் கட்டப்பட்ட பகுதிகளிலிருக்கும் முஸ்லிம்கள் தானாக வெளியேறினால் நல்லது. அப்படியில்லையென்றால், எத்தனை பேர் கொல்லப்படுவார்கள், என்ன நடக்கும் என்பது உள்ளிட்ட விளைவுகள் எதுவும் எங்களுக்குத் தெரியாது" என்று பேசியுள்ளார். அவரின் இந்தப் பேச்சு நாடு முழுவதும் பெரும் அதிர்வலைகளை ஏற்படுத்தியுள்ளது. ஈஸ்வரப்பா இதற்கு முன்னர் "எங்கள் கோவில்களை அழித்துக் கட்டப்பட்ட மசூதிகள் விட்டுவைக்கப்படாது. அத்தகைய ஒரு மசூதி கூட இந்த நாட்டில் நிலைக்காது. இது எனது தனிப்பட்ட கருத்து" என்று கூறியிருந்தார். மேலும், கடந்த ஆண்டு நடந்த சட்டமன்றத் தேர்தலின் போதுகூட, பா.ஜ.க வெற்றிபெற முஸ்லிம்கள் வாக்குகள் தேவையில்லை என அவர் கூறியிருந்ததும் குறிப்பிடத்தக்கது.