HBD A.R.Rahman| 'எல்லா புகழும் இறைவனுக்கே’!. இசை உலகை ஆளும் ஏ.ஆர்.ரகுமான் பற்றிய சுவாரசியமான தகவல்கள்!
HBD A.R.Rahman: எல்லை தாண்டி இசையால் இதயங்களைக் கட்டிப்போட்ட தமிழன்., தன்னுடைய இசையால் தமிழுக்கும், தேசத்திற்கும் மகுடம் சூட்டியவர் ஏ.ஆர்.ரஹ்மான். இந்தியாவின் ஆஸ்கர் நாயகன், இசைப்புயல் ஏ.ஆர்.ரஹ்மானின் 58வது பிறந்தநாள் இன்று. அவருக்கு பல்வேறு தரப்பினரும் வாழ்த்துகளை தெரிவித்து வருகின்றனர்.
அமெரிக்க மண்ணில், உலகமே உற்று நோக்கிய மேடையில் கையில் இரண்டு ஆஸ்கர்களை ஏந்தி, தன்னுடைய தாய் மொழிக்கும், தமிழினத்திற்கும் பெருமை சேர்த்த ஏ.ஆர்.ரஹ்மான் “எல்லா புகழும் இறைவனுக்கே” என்கிற வார்த்தையை உதிர்த்தார். அந்த மேடையை அடைய ஏ.ஆர்.ரஹ்மான் பல கரடு முரடான பாதைகளை கடக்க வேண்டி இருந்தது. புதிய பையன், என்ன தெரிந்து விடப்போகிறது.., கத்துக்குட்டி , பாரம்பரிய இசையில் நிலைக்க முடியாது இப்படித்தான் ஏ.ஆர்.ரஹ்மான் குறித்து, ரோஜா படம் வெளியான புதிதில் சிலரின் எண்ணம் இருந்தது. ஆனால் தன்னுடைய திறமை, மற்றும் முயற்சியின் மீது கொண்ட நம்பிக்கை, அவருக்கு எதிராய் வன்மம் கக்கியவர்களை மாற்றிப் பேச வைத்தது.
இந்தியாவின் 50-வது ஆண்டு சுதந்திர நாளைஒட்டி ஏ.ஆர். ரஹ்மான் வெளியிட்ட 'வந்தே மாதரம்' இசைத் தொகுப்பு இன்றுவரை ஓயவில்லை. மின்சாரக் கனவு, லகான், கன்னத்தில் முத்தமிட்டால் ஆகிய திரைப்படங்களுக்கு தேசியவிருதுகள் பெற்ற ஏ.ஆர்.ரஹ்மான் உலகளவில் பிரமிக்க வைத்தார்.
தமிழ்நாட்டின் இசை ஜாம்பவான்களான எம்.எஸ்.விஸ்வநாதன், இளையராஜா, டி.ராஜேந்தர் உள்ளிட்டவர்களிடம் உதவியாளராக பணிபுரிந்த ஏ.ஆர்.ரஹ்மான் விளம்பரப்படங்களுக்கு இசையமைத்துக் கொண்டிருந்த காலம். அப்போது மணிரத்னம் இயக்கிய ரோஜா படத்தில் இசையமைக்க, இயக்குநர் கே.பாலசந்தர் ஏ.ஆர்.ரஹ்மானை பரிந்துரை செய்தார். கவிதாலயா பிலிம்ஸின் ரோஜா திரைப்பட பாடல்கள் வெளியாகி யார் இந்த ஏ.ஆர்.ரஹ்மான் என அனைவரையும் திரும்பிப் பார்க்க வைத்தது. 90 களில் தமிழ் திரையில் மையம் கொண்ட ஓர் இசைப்புயல் பாலிவுட்டில் சூறாவளியாக சுழன்று பின் உலக அரங்கில் தடம் பதித்தது. 1992 ஆம் ஆண்டு ரோஜா பட கேசட்டுகள் விற்பனையில் சாதனை படைத்தது தனிக்கதை.
இயக்குநர் சங்கரின் அறிமுகப்படம் ஜெண்டில் மேன். அந்த படத்தில் ரஹ்மானோடு கை கோர்த்த சங்கர், அதன்பின் தொடர்ந்து இயக்கிய 5 படங்களில், ஏ.ஆர்.ரஹ்மோனோடு இணைந்து பயணித்தார். அத்தனை படங்களும் இசையில் அதிரி புதிரி ஹிட் அடித்தவை. காதலன் படத்தில் "முக்காலா முக்காபுலா", இந்தியன் படத்தில் "கப்பலேறி போயாச்சு", ஜீன்ஸ் படத்தில் "அன்பே அன்பே கொல்லாதே".. முதல்வன் படத்தில் "குறுக்கு சிறுத்தவளே", பாய்ஸ் படத்தில் "காதல் சொன்ன கணமே" என ஏ.ஆர்.ரஹ்மான் இசையமைத்த அத்தனை படங்களிலுமே பாடல்கள் ஹிட் அடித்தன.
ரஜினிகாந்த் நடித்த முத்து திரைப்படம் ஜப்பானில் பிரபலமாக ஏ.ஆர். ரஹ்மானின் இசையும் முக்கிய காரணமானது. டானி பாயில்(Danny Boyle) என்ற ஹாலிவுட் இயக்குநர் எடுத்த "ஸ்லம்டாக் மில்லியனர்" எனும் ஆங்கிலப் திரைப்படத்திற்கு இசை அமைத்ததற்காக, இரு ஆஸ்கார் விருதுகளை வென்ற ஏ.ஆர்.ரஹ்மான், உலகளவில் இந்திய இசையை கொண்டு சென்றார். அந்த மேடையில் "எல்லா புகழும் இறைவனுக்கே" என தமிழில் பேசிய ஏ.ஆர்.ரஹ்மான் உலக அரங்கில் பல கோடி ரசிகர்களை ஈர்த்துள்ளார். பொன்னியின் செல்வனின் வாள் வீச்சையும் வென்ற ஏ.ஆர்.ரஹ்மானின் இசை, இந்திய இசை வரலாற்றில் பிரத்யேக பக்கங்களை சொந்தம் கொண்டாடிவருவதாகவே கூறலாம்.
ஏ.ஆர்.ரஹ்மானால் மேற்கத்திய இசையை மட்டுமே தர முடியும் எனும் விமர்சனத்தை தவிடு பொடியாக்கியது கிழக்குச்சீமையிலே பாடல்கள். "மானூத்து மந்தையிலே", "எதுக்கு பொண்டாட்டி" போன்ற பாடல்கள் பாரம்பரிய மற்றும் கிராமிய இசையில் புதி உத்வேகத்தை அளித்தன. இசை மட்டுமல்லாது தன்னுடைய குரலாலும் மாயாஜாலங்களை நிகழ்த்தியவர் ரஹ்மான். அந்தக் குரலுக்கு ஆஸ்கர் கிடைத்ததில் ஆச்சரியம் ஒன்றும் இல்லை. ஆங்கிலத்தில் சொல்வதென்றால் – "HIS VOICE DESERVES". அவர் இசையமைத்து பாடிய "JAI HO" பாடல், அந்த அரபிக் கடலோரம், முஸ்தஃபா போன்ற பாடல்கள் மூலம் அவரது குரலுக்கு தனி ரசிகர்களை தேடித் தந்தது.
இசையில் தனக்கென தனிமேடை அமைத்துக் கொண்ட ஏ.ஆர்.ரஹ்மான் நிகழ்த்திய அற்புதங்களில் ஒன்று.. ஹம்மிங் மட்டுமே வைத்து உருவாக்கிய "ராசாத்தி என் உசுரு" பாடல். இயக்குநர் சங்கர், மணிரத்னம் உள்ளிட்டோரின் முதல் சாய்ஸாக ஏ.ஆர்.ரஹ்மான் இன்றளவும் இருக்க அவர் உருவாக்கும் மெட்டுகள் மட்டுமல்லாது, பின்னணி இசையும் முக்கிய காரணம். அதேபோல பின்னணிப் பாடகர்களான சித் ஸ்ரீராம், சுக்வீந்தர் சிங், சின்மயி, கார்த்திக், நரேஷ் ஐயர் போன்ற இளையவர்களை ரசிகர்களிடம் கொண்டு சேர்த்த ஏ.அர்.ரஹ்மானின் சமீபத்தில் வடிவேலுவின் மேஜிக் குரலில் வெளியான "மலையிலதான் தீப்பிடிக்குது ராசா" மற்றும் தேவாவின் குரலில் "நெஞ்சமே நெஞ்சமே" பாடல்கள் ரசிகர்களை கிறங்கடித்தன.
திரையுலகில் 30 ஆண்டுகளுக்கும் மேலாக இசையால் ஆட்சி செய்து கொண்டிருக்கும் ரஹ்மான் எனும் இசைப்புயல் ஆஸ்கர், தேசிய விருது உட்பட 175 விருதுகளை பெற்று ஆசியாவிலேயே அதிக விருதுகளை பெற்ற இசையமைப்பாளர் என்கிற சாதனையும் படைத்துள்ளார். இன்று இசையமைப்பாளர் ஏ.ஆர்.ரஹ்மான் தனது 58வது பிறந்தநாளை கொண்டாடுகிறார். சமூக வலைதளங்களில் பலரும் அவருக்கு வாழ்த்து தெரிவித்து வருகின்றனர்.
