மீண்டும் மும்பைக்கே திரும்பும் ஹர்திக்..!! குஜராத் அணிக்கு புதிய கேப்டன் யார் தெரியுமா..? அதிகாரப்பூர்வ அறிவிப்பு..!!

மும்பை அணிக்காக 7 ஆண்டுகளாக விளையாடி வந்த ஹர்திக் பாண்ட்யா, கடந்த 2021இல் குஜராத் அணிக்கு சென்றதோடு கேப்டனாகவும் நியமிக்கப்பட்டார். அந்த அணி அறிமுகமான முதல் தொடரிலேயே கோப்பையை வென்றதோடு, 2-வது ஆண்டிலும் இறுதிப்போட்டிக்கு சென்றது. கேப்டனாக ஹர்திக் பாண்ட்யாவின் செயல்பாடும் ரசிகர்கள் மத்தியில் கவனத்தை ஈர்த்தது.

இந்நிலையில், அடுத்த ஆண்டு ஐபிஎல் தொடருக்கான வீரர்களின் ஏலத்திற்கு முன்பாக, டிரேடிங் அடிப்படையில் ஹர்திக் பாண்ட்யா மீண்டும் மும்பை அணிக்கு திரும்ப உள்ளதாக வெளியாகியுள்ள தகவல் ரசிகர்களை ஆச்சரியப்படுத்தியுள்ளது. வரும் 19ஆம் தேதி வீரர்களுக்கான ஏலம் நடைபெறவுள்ள நிலையில், டிரேடிங் அடிப்படையில் வீரர்களை மாற்றிக் கொள்வதற்கான அவகாசம் 12ஆம் தேதி வரை நீட்டிக்கப்பட்டுள்ளது.

இதனால், குஜராத் அணி நேற்று வெளியிட்ட தக்க வைக்கப்பட்டுள்ள வீரர்களின் பட்டியலில் ஹர்திக் பாண்ட்யாவின் பெயர் இருந்தாலும், 12ஆம் தேதிக்குள் அவர் மும்பை அணிக்கு ஒப்பந்தமாகிவிடுவார் என கூறப்படுகிறது. ஒருவேளை அப்படி நடந்தால், குஜராத் அணியின் புதிய கேப்டன் யார் என்ற கேள்வி தற்போது எழுந்துள்ளது.

இந்நிலையில், ஹர்திக் பாண்ட்யாவின் இடத்தை இந்திய அணியின் நம்பிக்கை நட்சத்திரமாக உருவாகி வரும் சுப்மன் கில் நிரப்புவார் என எதிர்பார்க்கப்படுகிறது. அந்தவகையில், குஜராத் அணிக்கு புதிய கேப்டனாக சுப்மன் கில் அதிகாரப்பூர்வமாக அறிவிக்கப்பட்டுள்ளார்.