மார்ச் 2024க்குள் ஜிபிஎஸ் அடிப்படையிலான நெடுஞ்சாலை கட்டண வசூல் முறை..! மத்திய அமைச்சர் நிதின் கட்கரி

தற்போதுள்ள நெடுஞ்சாலை சுங்கச்சாவடிகளுக்கு பதிலாக ஜிபிஎஸ் அடிப்படையிலான சுங்கவரி வசூல் முறைகள் உள்ளிட்ட புதிய தொழில்நுட்பங்களை அடுத்த ஆண்டு மார்ச் மாதத்திற்குள் அரசாங்கம் அறிமுகப்படுத்தும் என்று மத்திய அமைச்சர் நிதின் கட்கரி தெரிவித்துள்ளார். போக்குவரத்து நெரிசலை குறைக்கவும், நெடுஞ்சாலைகளில் பயணித்த சரியான தூரத்திற்கு வாகன ஓட்டிகளிடம் கட்டணம் வசூலிக்கவும் இந்த நடவடிக்கை எடுக்கப்பட்டுள்ளதாக தெரிவித்தார்.

இது குறித்து பேசிய மத்திய அமைச்சர் நிதின் கட்கரி கூறியதாவது, ""நாட்டில் உள்ள சுங்கச்சாவடிகளுக்கு பதிலாக ஜிபிஎஸ் அடிப்படையிலான டோல் அமைப்புகள் உள்ளிட்ட புதிய தொழில்நுட்பங்களை அரசாங்கம் கவனித்து வருகிறது… அடுத்த ஆண்டு மார்ச் மாதத்திற்குள் நாடு முழுவதும் புதிய ஜிபிஎஸ் செயற்கைக்கோள் அடிப்படையிலான கட்டண வசூலை தொடங்குவோம். சாலை போக்குவரத்து மற்றும் நெடுஞ்சாலைகள் அமைச்சகம், வாகனங்களை நிறுத்தாமல் தானியங்கி முறையில் சுங்கவரி வசூல் செய்யும் வகையில், தானியங்கி நம்பர் பிளேட் ரெகக்னிஷன் சிஸ்டத்தின் (தானியங்கி நம்பர் பிளேட் ரீடர் கேமராக்கள்) இரண்டு முன்னோடித் திட்டங்களை நடத்தியது.

2018-19 ஆம் ஆண்டில், சுங்கச்சாவடியில் வாகனங்களுக்கான சராசரி காத்திருப்பு நேரம் 8 நிமிடங்கள். 2020-21 மற்றும் 2021-22 ஆம் ஆண்டுகளில் FASTags அறிமுகப்படுத்தப்பட்டதன் மூலம், வாகனங்களின் சராசரி காத்திருப்பு நேரம் 47 வினாடிகளாகக் குறைக்கப்பட்டது. குறிப்பிட்ட இடங்களில், குறிப்பாக நகரங்களுக்கு அருகில், மக்கள் தொகை அதிகம் உள்ள நகரங்களில், காத்திருப்பு நேரத்தில் கணிசமான முன்னேற்றம் காணப்பட்டாலும், பீக் ஹவர்ஸில் டோல் பிளாசாக்களில் இன்னும் சில தாமதங்கள் உள்ளன.

இதற்கிடையில், அடுத்த பொதுத் தேர்தலுக்கான மாதிரி நடத்தை விதிகள் அமலுக்கு வருவதற்கு முன், 1,000 கிலோமீட்டருக்கும் குறைவான நீளமுள்ள நெடுஞ்சாலைத் திட்டங்களுக்காக, பில்ட் ஆப்பரேட் டிரான்ஸ்ஃபர் (BOT) மாதிரியில், 1.5-2 லட்சம் கோடி ரூபாய் மதிப்பிலான சாலைத் திட்டங்களை அரசாங்கம் ஏலம் எடுக்கும். முன்னோக்கிச் செல்லும்போது, பெரும்பாலும் நெடுஞ்சாலை கட்டுமானத்திற்காக உள்கட்டமைப்பு முதலீட்டு அறக்கட்டளைகள் (InvITs) மாதிரியை நாங்கள் விரும்புகிறோம்" என்று அவர் கூறினார்.