திருச்சி: காதலித்த போது எடுத்துக் கொண்ட புகைப்படங்கள்.! கணவருக்கு அனுப்பிய காதலர்.! போலீசார் நடவடிக்கை.!

திருச்சியில் வசித்து வரும் பெண் ஒருவர், தனது முன்னாள் காதலன், அவருடன் எடுத்த தனிமையில் இருக்கும் புகைப்படங்களை கணவர் மற்றும் உறவினர்களுக்கு அனுப்பியதாக போலீசில் புகார் அளித்துள்ளார். இது குறித்து போலீசார் விசாரணையை மேற்கொண்டு வருகின்றனர்.

திருச்சி மணப்பாறையில் உள்ள மருங்காபுரி தாலுகாவில் வசித்து வரும் 22 வயது பெண், தனது திருமணத்திற்கு முன்பு மருதப் பட்டியைச் சேர்ந்த 24 வயது இளைஞரான கருணாகரன் என்பவரை காதலித்து வந்ததாக கூறப்படுகிறது. அவர்களுக்குள் ஏற்பட்ட கருத்து வேறுபாடு காரணமாக இருவரும் பிரிந்துவிட்டதாகவும் கூறப்படுகிறது.

மேலும் அந்தப் பெண் தற்போது வேறு ஒருவரை திருமணம் செய்து வாழ்ந்து வருகிறார். கருணாகரன், இவர்கள் இருவரும் காதலித்தபோது ஒன்றாக எடுத்துக் கொண்ட, தனிமையில் இருக்கும் புகைப்படங்களை அந்தப் பெண்ணின் கணவருக்கும், அவரது உறவினர்களுக்கும் வாட்ஸ்அப் மூலம் அனுப்பியது தெரியவந்துள்ளது.

இதனால் அதிர்ச்சியும், மன உளைச்சலும் அடைந்த அந்த பெண், மணப்பாறையில் உள்ள காவல் நிலையத்தில் புகார் அளித்துள்ளார். இதுகுறித்து கருணாகரன் மீது வழக்கு பதிவு செய்து போலீசார் விசாரணை மேற்கொண்டு வருகின்றனர்.