கொடுமை.! அவசர உதவி நம்பர்களும் சுவிட்ச் ஆஃப்.! புயலில் சிக்கித் தவிக்கும் பொதுமக்கள்.!

சென்னையில் பெய்து வரும் கனமழையால் பொது மக்களின் இயல்பு வாழ்க்கை கடுமையாக பாதிக்கப்பட்டிருக்கிறது. சாலைகள் மற்றும் தெருக்கள் வெள்ளம் சூழ்ந்த நிலையில் வீட்டிலிருந்து வெளியேற முடியாமல் பொதுமக்கள் மிகுந்த அவதிக்குள்ளாகி இருக்கின்றனர்.

மிக்ஜாம் புயல் காரணமாக சென்னை மற்றும் அதனை சுற்றி இருக்கும் மாவட்டங்களுக்கு புயல் எச்சரிக்கை அறிவிக்கப்பட்டு இருந்த நிலையில் கடந்த சில தினங்களாக இடைவிடாத கனமழை பெய்து வருகிறது. இதனால் பொதுமக்களின் இயல்பு வாழ்க்கை பாதிக்கப்பட்டுள்ளது. பொதுமக்கள் யாரும் வீட்டில் இருந்து வெளியே வர வேண்டாம் எனவும் ஏதேனும் அவசர உதவி தேவைப்பட்டால் அழைப்பதற்கு சில அவசர உதவி எண்களையும் அரசு வெளியிட்டு இருந்தது.

இந்நிலையில் அவசர எண்களும் சுவிட்ச் ஆஃப் செய்யப்பட்டு இருப்பதாக மருத்துவர் ஒருவர் வெளியிட்டிருக்கும் செய்தி அதிர்ச்சி அடைய செய்திருக்கிறது. செங்கல்பட்டு மாவட்டம் கல்பாக்கத்தில் மருத்துவமனை வைத்து நடத்தி வருபவர் புகழேந்தி. சென்னையில் வசித்து வரும் இவர் அதிகாலை தனது மருத்துவமனைக்கு தனியார் வாடகை வாகனத்தில் சென்று இருக்கிறார். அப்போது கடுமையான மழை வெள்ளம் சூழ்ந்ததால் பயணத்தை தொடர இயலவில்லை.

இதனைத் தொடர்ந்து அரசு வெளியிட்டிருந்த அவசர தொடர்பு எண்களை முயற்சி செய்துள்ளனர். அப்போது அசோக் நகர் எல்லைக்குட்பட்ட தீயணைப்பு அவசர எண் ஸ்விட்ச் ஆஃப் என்று வந்திருக்கிறது. இதனைத் தொடர்ந்து பல எண்களுக்கும் முயற்சி செய்தோம் எந்த பலனும் இல்லை. இதனால் வாகனத்தை அங்கேயே விட்டுவிட்டு பேருந்தில் வந்ததாக மன உளைச்சலுடன் தெரிவித்துள்ளார். அரசு அறிவித்திருக்கும் அவசர உதவி எண்கள் சுவிட்ச் ஆப் செய்யப்பட்டு இருப்பது பொதுமக்களிடம் ஏமாற்றத்தை ஏற்படுத்தி இருக்கிறது.