உங்க ரேஷன் அட்டையில் திருத்தம் செய்ய வேண்டுமா...? 10-ம் தேதி நடைபெறும் குறை தீர் முகாம்...!

காஞ்சிபுரம் மாவட்டத்தில் எதிர்வரும் 10.02.2024 அன்று விநியோகத்திட்ட குறை தீர் முகாம்கள் நடைபெற உள்ளன.

இது குறித்து மாவட்ட ஆட்சியர் தனது செய்தி குறிப்பில்; காஞ்சிபுரம் மாவட்டத்தில் எதிர்வரும் 10.02.2024 (சனிக்கிழமை) அன்று காலை 10.00 மணிக்கு, காஞ்சிபுரம் வட்டத்தில் கீழம்பி, உத்திரமேரூர் வட்டத்தில் பாலேஸ்வரம், வாலாஜாபாத் வட்டத்தில் இளையனார் வேலூர், திருப்பெரும்புதூர் வட்டத்தில் மாம்பாக்கம், குன்றத்தூர் வட்டத்தில் புதுப்பேர் ஆகிய கிராமங்களில் பொது விநியோகத்திட்ட குறை தீர் முகாம்கள் நடைபெற உள்ளன.

மேற்கண்ட கிராமங்களில் வசித்துவரும் பொது மக்கள் தங்கள் குடும்ப அட்டையில் பெயர் சேர்த்தல், நீக்கம், முகவரி மாற்றம். புதிய குடும்ப அட்டை / நகல் குடும்ப அட்டை, கைப்பேசி பதிவு / மாற்றம் செய்தலுக்கான கோரிக்கை மனுக்களை அளிக்கலாம். மேற்படி மனுக்கள் மீது உடன் தீர்வு காணப்படும். மேலும், மூன்றாம் பாலினத்தவர். பழங்குடியினர் மற்றும் நரிக்குறவர் சமுதாயத்தினை சேர்ந்தவர்கள் ஏதும் விடுபட்டிருப்பின் அவர்களும் புதிய குடும்ப அட்டைகள் பெறுவதற்குரிய மனுக்களை அளிக்கலாம் என மாவட்ட ஆட்சியர் தெரிவித்துள்ளார் ‌