இந்தியாவில் அதானி குழுமம் வாங்கிய மொத்த கடன் தொகை எத்தனை கோடி தெரியுமா..? பொதுமக்களுக்கும் ஆப்பு..?
தொழிலதிபர் கௌதம் அதானியின் குழுமம் இந்தியாவில் மட்டும் சுமார் 88,000 கோடி ரூபாயை கடனாக பெற்றுள்ளது அதிர்ச்சியை ஏற்படுத்தியுள்ளது.
நாட்டின் மிகப்பெரிய தொழிலதிபர்களில் ஒருவர் கௌதம் அதானி. தற்போது இவருக்கு எதிராக அமெரிக்காவில் கைது வாரண்ட் பிறப்பிக்கப்பட்டுள்ளது. மோசடி, ஊழல் மற்றும் லஞ்சம் என பல கடுமையான குற்றச்சாட்டுகள் அதானி மீது வைக்கப்பட்டுள்ளது. இந்த விவகாரம் வெளிச்சத்துக்கு வந்தவுடன் அதானி குழுமத்தின் பங்குகள் சட்டென சரிந்தன.
அதேபோல், எல்ஐசியின் பங்குகளும் சரிந்தன. இந்த சூழல் இந்தியாவின் நடுத்தர மக்களுக்கு ஆபத்தானது என பொருளாதார நிபுணர்கள் எச்சரித்துள்ளனர். வரும் நாட்களில் அதானி குழுமம் பொருளாதார ரீதியாக பாதிக்கப்பட்டால், சாமானியர்களும் பாதிக்கப்படலாம். ஏனென்றால், இந்த நிறுவனங்கள் அதானி குழுமத்தில் பல ஆயிரம் கோடி ரூபாய் கடன் கொடுத்து முதலீடு செய்திருக்கிறது.
ஒரே நாளில் 12,000 கோடி ரூபாய் நஷ்டம்
எல்ஐசி அதானி குழும நிறுவனங்களில் முதலீடு செய்துள்ளது. டிசம்பர் 31, 2022 நிலவரப்படி, அனைத்து அதானி குழும நிறுவனங்களிலும் ரூ.35,000 கோடிக்கும் அதிகமான பங்குகளை எல்ஐசி வாங்கியிருக்கிறது. அதானி குழுமத்தின் தோல்விக்குப் பிறகு எல்ஐசி ஒரு நாளில் சுமார் ரூ.12,000 கோடி நஷ்டம் அடைந்தது. வரும் நாட்களில் அதானி குழுமம் பொருளாதார ரீதியாக பாதிக்கப்பட்டால், எல்ஐசி போன்ற நிறுவனங்களில் பணத்தை போடும் சாமானியர்களும் பாதிக்கப்படலாம்.
இந்நிலையில், அதானி குழுமம் எந்தெந்த வங்கிகளில் கடன் பெற்றுள்ளது என்பது குறித்து தற்போது பார்க்கலாம். பாரத ஸ்டேட் வங்கி, யூனியன் பேங்க் ஆஃப் இந்தியா, ஐடிபிஐ வங்கி, REC, ஐசிஐசிஐ, ஆக்சிஸ் வங்கி, எஸ் பேங்க், IndusInd வங்கி, IDFC முதல் வங்கி, பேங்க் ஆஃப் இந்தியா, ஆர்பிஎல் வங்கிகளில் கடன் வாங்கியுள்ளது.
ரூ.88,000 ஆயிரம் கோடி கடன்
வங்கிகளும், நிதி நிறுவனங்களும் அதானி குழுமத்திற்கு மொத்தம் ரூ.88,000 கோடி கடனாக வழங்கியுள்ளன. நேற்று ஒரே நாளில் அந்த குழும பங்குகள் சுமார் 20% வரை சரிந்ததால், சுமார் 2.2 லட்சம் கோடி ரூபாய் இழந்துள்ளது. இந்நிலையில், அதானி குழுமத்தின் இந்த அதிர்ச்சியை சமாளிக்கும் போது, வரும் நாட்களில் பிக்சட் டெபாசிட் மற்றும் இதர சேமிப்பு திட்டங்களுக்கான வட்டி குறைக்கப்படுமா? என்ற கேள்வி எழுந்துள்ளது.