மத்திய தொழில்துறை பாதுகாப்பு படைக்கு முதன்முறையக பெண் தலைவர் நியமனம்!… யார் இந்த நினா சிங்!

மத்திய தொழில்துறை பாதுகாப்பு படை(CISF Chief)யின் வரலாற்றில் முதல்முறையாக, அந்த பிரிவின் தலைவராக நினா சிங் என்ற பெண் ஒருவர் நியமிக்கப்பட்டுள்ளார்.

ராஜஸ்தானை சேர்ந்த ஐ.பி.எஸ் அதிகாரியான நினா சிங் 2021ம் ஆண்டில் இருந்து மத்திய தொழிற்பாதுகாப்புப் படையில் இருந்து வருகிறார். தற்போது மத்திய தொழிற்பாதுகாப்புப் படையின் சிறப்பு டி.ஜி யாக இருந்து வருகிறார். 2013-18ம் ஆண்டு வரை சி.பி.ஐ. இணை இயக்குநராகப் பணியாற்றிய நினா சிங், மும்பையில் பெரும் பரபரப்பை ஏற்படுத்திய ஷீனா போரா கொலை வழக்கு, மற்றும் நடிகை ஜியா கான் தற்கொலை வழங்கு விசாரணைகளை தன் நேரடிப் பார்வையில் மேற்கொண்டவர்.

பெண்கள், காவல்துறை அதிகாரிகளாக மத்திய அரசின் முக்கியப் பதவிகளில் இருக்கின்றனர். இந்நிலையில் தற்போது நினா சிங் என்ற ஐ.பி.எஸ் அதிகாரி, முதல் பெண்ணாக முக்கியப் பதவியில் நியமிக்கப்பட்டுள்ளார். மத்திய தொழிற்பாதுகாப்பு படையின் புதிய டி.ஜி யாக நினா சிங் நியமிக்கப்பட்டுள்ளார். இந்நிறுவனத்தின் டி.ஜி ஆக பெண் நியமிக்கப்படுவது இதுவே முதன்முறை.

நினா சிங் மணிப்பூர் கேடர் அதிகாரியாக இந்திய போலீஸ் சேவையை (ஐபிஎஸ்) தொடர்ந்தாலும், பின்னர் ராஜஸ்தான் கேடருக்கு மாறினார். 1989 பேட்ச் ஐபிஎஸ் அதிகாரியான இவர், இந்த ஆண்டு ஆகஸ்ட் 31-ம் தேதி ஷீல் வர்தன் சிங் ஓய்வு பெற்றதை தொடர்ந்து சிஐஎஸ்எஃப் டிஜியாகவும் கூடுதல் பொறுப்பை வகித்து வருகிறார். தற்போது அவர் CISF இன் சிறப்பு இயக்குநர் ஜெனரலாக உள்ளார். இந்த பிரிவானது நாடு முழுவதும் விமான நிலையங்கள், டெல்லி மெட்ரோ, அரசு கட்டிடங்கள் மற்றும் திட்ட நிறுவல்கள் தொடர்பான பாதுகாப்பு பணிகளை நிர்வகிக்கிறது. ஜூலை 31, 2024 வரை சிஐஎஸ்எஃப் டிஜியாக நினா சிங்கை நியமிக்க அமைச்சரவையின் நியமனக் குழு ஒப்புதல் அளித்துள்ளது.

1989-ம் ஆண்டு ஐ.பி.எஸ் அதிகாரியான நினா சிங், தனது இந்தப் புதிய பதவியில் அடுத்த ஆண்டு ஜூலை வரை நீடிப்பார். நினா சிங்கின் கணவர் ரோஹித் குமார் ஐ.ஏ.எஸ் அதிகாரி. அவர் தற்போது மத்திய நுகர்வோர் துறை அமைச்சகத்தின் செயலாளராக இருக்கிறார். நினா சிங், பீகாரை சேர்ந்தவர். ராஜஸ்தானில் ஐ.பி.எஸ் அதிகாரியாக நியமிக்கப்பட்ட முதல் பெண்ணும் இவர் என்பது குறிப்பிடத்தக்கது. ஹார்வேர்டு பல்கலைக்கழகத்தில் பொது நிர்வாகத்தில் முதுகலைப்பட்டம் பெற்றுள்ள நினா சிங் ராஜஸ்தானில் போலீஸ் துறையில் பல்வேறு பதவிகள் வகித்துள்ளார். ராஜஸ்தானில் பெண்கள் கமிஷன் செயலாளராக இருந்தபோது பல்வேறு முக்கியத் திட்டங்களை நிறைவேற்றினார்.

இதேபோல், 1988 பேட்சை சேர்ந்த மணிப்பூர் கேடர் ஐபிஎஸ் அதிகாரியான அனிஷ் தயாள் சிங், உலகின் மிகப்பெரிய துணை ராணுவப் படையான மத்திய ரிசர்வ் போலீஸ் படையின் (சிஆர்பிஎஃப்) டைரக்டர் ஜெனரலாக நியமிக்கப்பட்டுள்ளார். கடந்த சில வாரங்களாக இந்தோ-திபெத் எல்லைக் காவல் துறையின் (ஐடிபிபி) தலைமைப் பொறுப்பை இவர் கூடுதலாக வகித்து வருகிறார். டிசம்பர் 31, 2024 அன்று ஓய்வு பெறும் வரை அவர் சிஆர்பிஎஃப் தலைவராக இருப்பார். சுமார் 3.25 லட்சம் வீரர்களைக் கொண்ட சிஆர்பிஎஃப், அமைதியைப் பேணுவதற்காக நாடு முழுவதும் செயல்படுகிறது. ஜம்மு காஷ்மீரில் தீவிரவாதத்தை முறியடிப்பதில் தீவிர பங்காற்றுகிறது.

மணிப்பூர் கேடரின் 1989-பேட்ச் ஐபிஎஸ் அதிகாரியான ரஸ்கோத்ரா, உளவுத்துறை பணியகத்தில் கிட்டத்தட்ட மூன்று தசாப்தங்களாக முக்கியமான பதவிகளில் பணியாற்றியுள்ளார். இந்நிலையில், 90,000 பணியாளர்களைக் கொண்ட ITBP இன் டைரக்டர் ஜெனரலாக நியமிக்கப்பட்டுள்ளார். சீன-இந்திய எல்லையில் நிறுத்தப்பட்டுள்ள ITBP க்கு ரஸ்கோத்ராவின் நியமனம், துணை ராணுவப் படையில் கண்காணிப்பு மற்றும் உளவுத்துறை சேகரிப்புக்காக உளவுத்துறை அதிகாரிகளின் கூடுதல் குழு இருக்கும் நேரத்தில் நடைபெற்றுள்ளது. ரஸ்கோத்ரா உளவுத்துறை பணியகத்தில் (IB) சிறப்பு இயக்குநராக இருந்தார். அவர் செப்டம்பர் 30, 2025 வரை பதவியில் தொடருவார் அதாவது அவர் ஓய்வுபெறும் தேதி வரை என்று உத்தரவில் கூறப்பட்டுள்ளது.

1989-ம் ஆண்டு குஜராத் கேடரைச் சேர்ந்த ஐபிஎஸ் அதிகாரியான விவேக் ஸ்ரீவஸ்தவா, தீயணைப்பு சேவை, குடிமைத் தற்காப்பு மற்றும் ஊர்க்காவல் படையின் டைரக்டர் ஜெனரலாக நியமிக்கப்பட்டுள்ளார். ஜூன் 30, 2025 வரை, அதாவது ஓய்வு பெறும் தேதி வரை அவர் பதவியில் நியமிக்கப்பட்டுள்ளார் என்று உத்தரவில் தெரிவிக்கப்பட்டுள்ளது. ஸ்ரீவஸ்தவா தற்போது ஐபியில் சிறப்பு இயக்குநராக உள்ளார்.