மது அருந்துவதால் 7 வகை புற்றுநோய் ஏற்படும் ஆபத்து அதிகம்.. ஆய்வில் அதிர்ச்சி தகவல்..

அமெரிக்க சர்ஜன் ஜெனரல் விவேக் மூர்த்தி பானங்களின் எண்ணிக்கையால் புற்றுநோய் அபாயம் அதிகரிக்கும் என்று எச்சரித்துள்ளார். புற்று நோய் வருவதற்கு மதுபானம் முக்கிய காரணமாகும், மேலும் மதுபானங்களில் சிகரெட் பெட்டிகளில் இருப்பது போன்ற எச்சரிக்கை லேபிள்கள் இருக்க வேண்டும் என்று அமெரிக்க சர்ஜன் ஜெனரல் டாக்டர் விவேக் மூர்த்தி வலியுறுத்தியுள்ளார்.

அமெரிக்காவில் ஆண்டுதோறும் குடிபோதையில் வாகனம் ஓட்டும் விபத்துக்களால் ஏற்படும் 13,500 இறப்புகளை விட மதுபானம் தொடர்பான புற்றுநோய் இறப்புகள் அதிகம் என்றும் அவர் எடுத்துரைத்தார். அவர் வெளியிட்டுள்ள ஆலோசனையில், அமெரிக்காவில் புகை பிடிப்பது மற்றும் உடல் பருமனுக்கு அடுத்தபடியாக புற்றுநோயை ஏற்படுத்தக்கூடிய மூன்றாவது முக்கிய காரணியாக மது அருந்துதல் உள்ளது. அமெரிக்க உணவு வழிகாட்டுதல்கள் தற்போது ஆண்களுக்கு ஒரு நாளைக்கு இரண்டு அல்லது அதற்கும் குறைவான மது பானங்களையும், பெண்களுக்கு ஒரு நாளைக்கு ஒன்று அல்லது அதற்கும் குறைவாகவும் பரிந்துரைக்கின்றன.

இந்த நிலையில் மது அருந்துதல் வரம்புகள் குறித்த வழிகாட்டுதல்களை மறுமதிப்பீடு செய்ய வேண்டும் என்றும் மூர்த்தி அழைப்பு விடுத்துள்ளார். மக்கள் எவ்வளவு குடிக்க வேண்டும் என்பதை தீர்மானிக்கும் அதேவேளையில் புற்றுநோய் அபாயம் குறித்தும் அவர்களுக்கு அறிவுறுத்தவேண்டும் என்று அவர் கூறியுள்ளார். மது அருந்துவது மார்பகம், பெருங்குடல் மற்றும் கல்லீரல் புற்றுநோய் உட்பட ஏழு வகையான புற்றுநோய்களின் அபாயத்தை அதிகரிக்கிறது, ஆனால் பெரும்பாலான அமெரிக்க நுகர்வோர் இதைப் பற்றி அறிந்திருக்கவில்லை என்று யு.எஸ் சர்ஜன் ஜெனரல் விவேக் மூர்த்தி குறிப்பிட்டுள்ளார்.

மதுபானங்கள் மீதான லேபிளில் புற்றுநோய் அபாயங்கள் பற்றிய எச்சரிக்கையைக் கொண்டிருக்க வேண்டும். சிகரெட் பாக்கெட்டின் மீது உள்ளது போன்ற புகைப்படம் இல்லாவிட்டாலும் மது பாட்டில்களின் லேபிள்களில் புற்றுநோய் குறித்த எச்சரிக்கை இருக்க வேண்டும் என்று அவர் தெரிவித்துள்ளார். அமெரிக்க சர்ஜன் ஜெனரல் விவேக் மூர்த்தி தெரிவித்திருக்கும் இந்த கருத்துக்கள் மீது அமெரிக்க காங்கிரஸ் இறுதி முடிவு எடுக்கும் என்று கூறப்படுகிறது.

ஆலோசனையின்படி, அமெரிக்காவில் ஆல்கஹால் தொடர்பான புற்றுநோயின் மிகப்பெரிய சுமை பெண்களுக்கு மார்பக புற்றுநோயாகும், 2019 ஆம் ஆண்டில் 44,180 வழக்குகள் இருப்பதாக மதிப்பிடப்பட்டுள்ளது. இது பெண்களுக்கு சுமார் 270,000 மார்பக புற்றுநோய்களில் 16.4% ஆகும். அமெரிக்க அதிபராக தேர்வு செய்யப்பட்டுள்ள டொனால்ட் டிரம்ப் இன்னும் இரண்டு வாரங்களில் பதவியேற்க உள்ள நிலையில் விவேக் மூர்த்தியின் இந்த பரிந்துரையை அடுத்ததாக வரவிருக்கும் அமெரிக்க சர்ஜன் ஜெனரல் அதனை எப்படி அமல்படுத்துவார் என்பதை பொறுத்தே இதன் செயல்பாடு இருக்கும் என்பது குறிப்பிடத்தக்கது.

Read more ; இதய ஆரோக்கியத்திற்கு கொழுப்பு அவசியம்.. ஆனா இதை செய்தால் தான் நல்ல கொலஸ்ட்ரால் அளவு அதிகரிக்கும்…