’அனுமதியே வாங்காமல் பேனர், கொடிக்கம்பம்’..!! நடிகர் விஜய் கட்சியினரால் பரபரப்பு..!!

பிரபல முன்னணி சினிமா நடிகரான விஜய், தமிழக வெற்றி கழகம் என்ற கட்சியை தொடங்கியுள்ளார். மேலும், வரும் மக்களவைத் தேர்தலில் போட்டியிட போவதில்லை என்றும் 2026 சட்டமன்ற தேர்தலே இலக்கு என்றும் அறிவித்துள்ளார். இந்நிலையில், விஜய் கட்சி தொடங்கியதை கொண்டாடும் வகையில் விஜய் ரசிகர் மன்ற உறுப்பினர்கள் மற்றும் பொறுப்பாளர்கள் அந்தந்த பகுதியில் கொடிக்கம்பங்களை வைத்து இனிப்புகள் வழங்கி கொண்டாடி வருகின்றனர்.

அந்த வகையில், நேற்று மதியம் தமிழக வெற்றி கழகத்தின் விருகம்பாக்கம் தொகுதி பொறுப்பாளர் வேல்முருகன் தனது ஆதரவாளர்கள் 40-க்கும் மேற்பட்டோருடன் சேர்ந்து எம்ஜிஆர் நகர் மார்கெட் பகுதியில் வழி நெடுகிலும் பேனர் வைத்து கொடிக்கம்பங்களை நட்டு அதில் விஜய் ரசிகர் மன்ற கொடிகளை ஏற்றி இனிப்புகள் வழங்கி கொண்டாடினார். பொதுவாக கட்சி கொடிக்கம்பங்கள் வைக்க காவல் நிலையத்தில் அனுமதி பெற்ற வேண்டும்.

ஆனால், புதிதாக கட்சி தொடங்கிய தமிழக வெற்றி கழகத்தின் நிர்வாகிகள் காவல்துறையில் அனுமதி வாங்காமல் கொடிக்கம்பங்கள் வைத்த சம்பவம் பெரும் சர்ச்சையை ஏற்படுத்தியுள்ளது. இந்நிலையில், நடிகர் விஜய் கட்சியினர் அனுமதி பெறாமல் கொடிக்கம்பங்கள் வைத்தது தொடர்பாக எம்ஜிஆர் நகர் போலீசார் விசாரணை மேற்கொண்டு வருகின்றனர்.