அடுத்த ஆபத்து.. விரைவில் மற்றொரு பெருந்தொற்று தாக்கப் போகிறது.. கடுமையாக எச்சரித்த பில்கேட்ஸ்..!
கோவிட் பெருந்தொற்றுக்கு பிறகு புதிதாக எந்த வைரஸ் அல்லது தொற்று பரவினாலும் அது அடுத்த பெருந்தொற்றாக மாறுமா என்ற அச்சம் உலகம் முழுவதும் பரவி வருகிறது. சமீபத்தில் சீனாவில் பரவிய HMPV வைரஸ் உட்பட பல நோய்களை அதற்கு உதாரணமாக சொல்லலாம்.
இந்த நிலையில் அடுத்த பெருந்தொற்று விரைவில் உலகை தாக்கலாம் என்று பிரபல தொழிலதிபரும் கோடீஸ்வரருமான பில்கேட்ஸ் எச்சரித்துள்ளார். இதுகுறித்து அவர் அளித்த பேட்டியில், "அடுத்த 4 ஆண்டுகளில் இயற்கையான தொற்றுநோய்க்கான வாய்ப்பு 10 முதல் 15 சதவீதம் வரை உள்ளது. கடந்த முறை இருந்ததை விட நாம் உண்மையில் அதற்குத் தயாராக இருக்கிறோம் என்ற சொன்னால் நன்றாக தான் இருக்கும்.. ஆனால் இதுவரை நாம் தயாராக இல்லை என்பது தான் உண்மை. நாம் இன்னும் அடுத்த பெருந்தொற்றுக்கு முற்றிலும் தயாராக இல்லை" என்று அவர் கூறினார்.
தயார்நிலை குறித்த கவலைகள்
அரசியல் பிளவுகள் மற்றும் தேவையான கருவிகளில் ஒருமித்த கருத்து இல்லாததை மேற்கோள் காட்டிய பில்கேட்ஸ், உலகம் மற்றொரு தொற்றுநோய்க்கு தயாராக இல்லை என்று தெரிவித்தார். மேலும் பேசிய அவர் "மக்கள் ஒருமித்த கருத்தைக் கொண்டிருப்பதற்குப் பதிலாக, செய்யப்பட்ட பல்வேறு தவறுகளை மீண்டும் மீண்டும் செய்கிறார்கள். டிரில்லியன் கணக்கான டாலர்கள் மற்றும் மில்லியன் கணக்கான உயிர்கள் இழந்த பிறகு, நீங்கள் எதிர்பார்க்கும் அளவுக்கு நாங்கள் முன்னேறிவிட்டோம் என்று நான் கூறமாட்டேன்" என்று தெரிவித்தார்.
பில்கேட்ஸின் நீண்டகால கருத்து
கேட்ஸ் பல ஆண்டுகளாக தொற்றுநோய் தயார்நிலைக்கு குரல் கொடுக்கும் வக்கீலாக இருந்து வருகிறார். 2015 ஆம் ஆண்டு நடைபெற்ற TED உரையில், உலகம் ஒரு கொடிய தொற்றுநோய்க்கு "தயாராக இல்லை" என்று எச்சரித்தார். அவர் கூறியது போலவே கோவிட் 19 எனும் பெருந்தொற்று 2019-ல் உலகை தாக்கியது. 2022 ஆம் ஆண்டில், உலகளவில் சுகாதார உள்கட்டமைப்பை மேம்படுத்துவதற்கான நுண்ணறிவுகள் மற்றும் உத்திகளை வழங்கும் "அடுத்த தொற்றுநோயை எவ்வாறு தடுப்பது" என்ற புத்தகத்தை அவர் வெளியிட்டார்.
பில்கேட்ஸ் அறக்கட்டளையின் பங்கு
பில்கேட்ஸ் தனது அறக்கட்டளை மூலம், தடுப்பூசி ஆராய்ச்சி, நோய் கண்காணிப்பு மற்றும் தனிமைப்படுத்தப்பட்ட கொள்கைகளில் முதலீடுகள் உள்ளிட்ட சிறந்த ஆயத்த நடவடிக்கைகளுக்கு அழுத்தம் கொடுத்துள்ளார். COVID-19 இன் கடுமையான கட்டத்தை முடிவுக்குக் கொண்டுவரவும் எதிர்கால தொற்றுநோய்களுக்குத் தயாராகவும் உதவுவதற்காக அறக்கட்டளை அமெரிக்காவில் $125 மில்லியன் வரை வழங்கி உள்ளது..
அரசியல் மற்றும் அறிவியல் சவால்கள்
கோவிட்-19 பெருந்தொற்றில் இருந்து நாம் கற்றுக்கொள்ள வேண்டிய பாடங்கள் இருந்தாலும் அரசியல் கருத்து வேறுபாடுகள் மற்றும் போதுமான உலகளாவிய ஒத்துழைப்பு காரணமாக முன்னேற்றம் மெதுவாக உள்ளது என்று பில்கேட்ஸ் வாதிடுகிறார்.
காலநிலை மாற்றம் மற்றும் மக்கள்தொகை பெருக்கம் ஆகியவை எதிர்கால தொற்றுநோய்களின் சாத்தியக்கூறுகளை மேலும் அதிகரிக்கின்றன என்று அறிவியல் ஆராய்ச்சி கூறுகிறது.
அமெரிக்க தொற்றுநோய் தயார்நிலை கொள்கைகள் தொடர்பான நிச்சயமற்ற தன்மைக்கு மத்தியில் பில்கேட்ஸின் எச்சரிக்கை வந்துள்ளது.. எதிர்காலத்தைப் பொறுத்தவரை, உலகளாவிய அமைதியின்மை ஒரு பெரிய போர் உட்பட புதிய சவால்களைத் தூண்டக்கூடும் என்று பில்கேட்ஸ் கவலை தெரிவித்துள்ளார். உலகளாவிய ஒத்துழைப்பு அதிகரிக்க வேண்டும் எனவும், வலுவான சுகாதாரக் கொள்கைகள் மற்றும் எதிர்கால தொற்றுநோய்களின் அபாயங்களைக் குறைப்பதற்கான மேம்பட்ட ஆராய்ச்சி முயற்சிகள் மேற்கொள்ளப்பட வேண்டும் எனவும் அவர் தொடர்ந்து கூறி வருகிறார்.