விஜய், ரஜினியை பின்னுக்கு தள்ளிய அல்லு அர்ஜுன்.. புஷ்பா 2 படத்திற்கு அவர் வாங்கிய சம்பளம் இத்தனை கோடியா?

இந்த ஆண்டின் மிகவும் எதிர்பார்க்கப்படும் புஷ்பா 2 படத்தின் ரிலீஸ் தள்ளிப்போய்க் கொண்டே இருந்த நிலையில், ஒருவழியாக இந்த படம் டிசம்பர் 5-ம் தேதி திரையரங்குகளில் வெளியாக உள்ளது. சமீபத்தில் வெளியான புஷ்பா 2 படத்தின் ட்ரெயிலருக்கு ரசிகர்கள் மத்தியில் நல்ல வரவேற்பு கிடைத்தது. மேலும் இந்த படத்தில் இடம்பெற்றுள்ள கிஷ்க் பாடலுக்கு நடிகை ஸ்ரீ லீலா நடனம் ஆடியுள்ளார்.

இந்த பாடலை சென்னையில் நடந்த புரமோஷன் நிகழ்ச்சியில் படக்குழுவினர் ரிலீஸ் செய்த நிலையில், இந்த பாடலும் ரசிகர்களிடையே கவனம் பெற்று வருகிறது. புஷ்பா படக்குழுவினர் தற்போது புரமோஷன் பணிகளில் தீவிரமாக ஈடுபட்டு வருகின்றனர்.

இந்த சூழலில் புஷ்பா படத்தில் நடித்த நடிகர் நடிகைகளின் சம்பள விவரங்கள் வெளியாகி உள்ளது. அதன்படி அல்லு அர்ஜுனுக்கு இந்த படத்தில் நடிக்க ரூ. 300 கோடி சம்பளம் கொடுக்கப்பட்டதாக தகவல்கள் தெரிவிக்கின்றன. இதன் மூலம் நாட்டிலேயே அதிக சம்பளம் வாங்கும் நடிகராக அல்லு அர்ஜுன் மாறி உள்ளார்.

ரஜினி, விஜய் மட்டுமின்றி, ஷாருக்கான் சல்மான் கான் மற்றும் ஷாருக்கான் போன்ற பாலிவுட் நடிகர்களையும் மிஞ்சிவிட்டார் அல்லு அர்ஜுன். ரஜினி தற்போது நடித்து வரும் கூலி படத்திற்கு ரூ.260 - ரூ.280 கோடி சம்பளம் பெற்றதாக கூறப்படுகிறது. விஜய் தற்போது நடித்து வரும் தளபதி 69 படத்திற்கு ரூ.275 கோடி சம்பளம் வாங்கி உள்ளதாக கூறப்படுகிறது.

புஷ்பா முதல் பாகத்தில் ஸ்ரீவல்லியாக ரசிகர்களை கவர்ந்த ராஷ்மிகா மந்தனா, தற்போது புஷ்பா 2 படத்திலும் நடித்துள்ளார். இந்த படத்தில் நடிக்க ராஷ்மிகாவுக்கு ரூ. 10 கோடி சம்பளம் வழங்கப்பட்டுள்ளதாக கூறப்படுகிறது.

தனது தனித்துவமான நடிப்புத் திறமைக்கு பெயர் பெற்ற ஃபஹத் ஃபாசில், புஷ்பா முதல் பாகத்தில் சில நிமிடங்கள் மட்டுமே நடித்திருந்தார். இந்த நிலையில் புஷ்பா 2 படத்தில் அவர் முக்கிய வில்லனாக வர உள்ளார். இந்த படத்தில் நடிக்க ஃபஹத் ஃபாசில் ரூ 8 கோடி சம்பளம் பெற்றுள்ளதாக கூறப்படுகிறது.

அதே போல் தனது அசாதாரண நடனத் திறமைக்கு பெயர் பெற்ற ஸ்ரீ லீலாவின் நடனம் இந்த படத்திற்கு சிறப்பம்சங்களில் ஒன்றாக இருக்கும் என்று எதிர்பார்க்கப்படுகிறது. இந்த படத்தில் நடனமாடியதற்காக ஸ்ரீ லீலா ரூ 2 கோடி சம்பளம் பெற்றதாக கூறப்படுகிறது.

கடந்த 2021-ம் ஆண்டு சுகுமாறன் இயக்கத்தில் அல்லு அர்ஜுன், ராஷ்மிகா மந்தனா, ஃபஹத் ஃபாசில் உள்ளிட்ட பலரின் நடிப்பில் வெளியான படம் புஷ்பா. இந்த படத்திற்கு நல்ல வரவேற்பு கிடைத்தது. பான் இந்தியா அளவில் மிகப்பெரிய வெற்றிப் படமாகவும் இது மாறியது.

இதை தொடர்ந்து ரூ.500 கோடி என்ற பிரம்மாண்ட பட்ஜெட்டில் புஷ்பா 2 படம் உருவாகி உள்ளது. இந்த ஆண்டு ஆகஸ்ட் 15-ம் தேதி இப்படம் வெளியாகும் என்று முதலில் அறிவிக்கப்பட்டது. எனினும் சில காரணங்களால் படத்தின் ரிலீஸ் தள்ளிப்போனது. இந்த சூழலில் மிகுந்த எதிர்ப்பார்ப்புக்கு மத்தியில் புஷ்பா 2 படம், வரும் டிசம்பர் 5-ம் தேதி பிரமாண்டமாக வெளியிட திட்டமிடப்பட்டுள்ளது. புஷ்பா 2 தமிழ், தெலுங்கும், மலையாளம், கன்னடம், ஹிந்தி என 5 மொழிகளில் வெளியாக உள்ளது.

புஷ்பா 2 படத்தின் ட்ரெயிலருக்கு நல்ல வரவேற்பு கிடைத்துள்ள நிலையில் இந்த படம் உள்நாட்டு பாக்ஸ் ஆபிஸ் வசூலில் மட்டும் இப்படம் ரூ 1000 கோடியை தாண்டும் என்று திரைத்துறை ஆய்வாளர்கள் கணித்துள்ளனர். புஷ்பா 2 இந்த ஆண்டின் மிகப்பெரிய பிளாக்பஸ்டர் படங்களில் ஒன்றாக மாறும் என்றும் எதிர்பார்க்கப்படுகிறது.

Read More : இந்தியாவின் மிகவும் பிரபலமான நடிகர் இவர் தான்… கண்டிப்பா ரஜினி, விஜய், ஷாருக்கான் இல்ல..