தமிழகமே ஷாக்..! 2 மற்றும் 4 சக்கர வாகனங்கள் என அனைத்திற்கும் வரி உயர்வு...! இன்று முதல் அமல்... எவ்வளவு தெரியுமா...?

2 மற்றும் 4 சக்கர வாகனங்கள், ஆம்னி பேருந்துகள், சரக்கு வாகனங்கள் என அனைத்து வாகனங்களுக்குமான வரி உயருகிறது.

தமிழ்நாடு மோட்டார் வாகன வரிவிதிப்பு (திருத்தம்) சட்டம், 2023, பழைய மற்றும் புதிய இருசக்கர வாகனங்கள், நான்கு சக்கர வாகனங்கள், சரக்கு வாகனங்கள் மற்றும் பிற வாகனங்கள் மீதான ஆயுள் வரி விகிதத்தை தமிழக அரசு உயர்த்தி உள்ளது. இன்று முதல் நடைமுறைக்கு வந்துள்ளது.

உள்துறை அமைச்சகத்தின் அறிவிப்பின்படி, தமிழக ஆளுநர் ஆர்.என். ரவி நவம்பர் 9, 2023 அன்று சட்டம் அமலுக்கு வரும் என அறிவித்தார். தமிழ்நாடு மோட்டார் வாகனங்கள் வரி விதிப்பு சட்டம், 1974ஐ திருத்துவதற்கான மசோதாவை தமிழ்நாடு சட்டமன்றம் கடந்த மாதம் ஏற்றுக்கொண்டது. இந்த வார தொடக்கத்தில் ரவி அதற்கு தனது ஒப்புதலை அளித்தார்.

புதிய மோட்டார் வாகனத்தின் மொத்த விலை ரூ.1 லட்சத்துக்கு மேல் இருந்தால் 12% மற்றும் 10% ஆயுள் வரி விதிக்கப்படும். புதிய கார்கள் மற்றும் பிற மோட்டார் வாகனங்களில், வாகனத்தின் விலை ரூ.20 லட்சத்திற்கு மேல் இருந்தால் ஆயுள் வரி விகிதம் 20% ஆக இருக்கும். ரூ.10 லட்சம் முதல் ரூ.20 லட்சம் வரையிலான புதிய கார்கள் மற்றும் பிற புதிய மோட்டார் வாகனங்களுக்கு ஆயுள் வரி 18% ஆகவும், ரூ.5 லட்சம் முதல் ரூ.10 லட்சம் வரை விலையுள்ள வாகனங்களுக்கு 13% ஆகவும் இருக்கும். ரூ.5 லட்சத்துக்கும் குறைவான வாகனங்களுக்கு ஆயுள் வரி 12% ஆக இருக்கும்.

சரக்கு வாகனங்கள், வாடகைக்கு இயக்கப்படும் வாகனங்கள், பயணிகள் போக்குவரத்து வாகனங்கள், சுற்றுலா வாகனங்கள், ஒப்பந்த வாகனங்கள், ஆம்னி பேருந்துகள், அனைத்து வகை புதிய மற்றும் பழைய இரு சக்கர வாகனங்கள், ஆட்டோ உள்ளிட்ட 3 சக்கர வாகனங்கள், கல்வி நிறுவனங்களுக்குச் சொந்தமான பேருந்துகள் மற்றும் வாகனங்கள், கட்டுமானத்துக்குப் பயன்படும் வாகனங்கள், கார்கள், டாக்சிகள், ’கேப்’கள் என அனைத்து வகை மோட்டார் வாகனங்களுக்கு புதிய வரி பொருந்தும். சுற்றுலா ஒப்பந்த வாகனங்களுக்கான காலாண்டு வரி ரூ.4,900ஆக உயர்கிறது. படுக்கை வசதி கொண்ட ஆம்னி பேருந்துகளுக்கு ரூ.4000 வரையிலும், இரு சக்கர வாகனத்திற்கு ரூ.375, இலகு ரக வாகனத்திற்கு ரூ.2,250 வரையிலும் வரி உயர்கிறது.