’எனக்கு சொந்தமா கார் கூட இல்ல’..!! வேட்புமனுவில் முதல்வர் சந்திரசேகர ராவ் தகவல்..!!

தெலங்கானா சட்டப்பேரவை தேர்தல் வரும் 30ஆம் தேதி நடைபெறவுள்ளது. இதற்கான வேட்பு மனு தாக்கல் கடந்த 3ஆம் தேதி தொடங்கியது. வேட்புமனு தாக்கல் செய்ய நேற்றே கடைசி நாளாகும். இந்நிலையில், முதல்வர் கே.சந்திரசேகர ராவ் சித்திப்பேட்டை மாவட்டம் கஜ்வேல் தொகுதியில் வேட்பு மனுதாக்கல் செய்தார்.

இத்தொகுதியில் இருந்து சட்டப்பேரவைக்கு அவர் இரண்டு முறை தேர்வு செய்யப்பட்டுள்ளார். இதையடுத்து மதியம் அவர் காமாரெட்டி மாவட்டம் காமாரெட்டி தொகுதியில் வேட்பு மனு தாக்கல் செய்தார். சந்திரசேகர ராவ் முதல்முறையாக 2 பேரவைத் தொகுதிகளில் போட்டியிடுகிறார்.

முதல்வரின் மகனும் ஐடி துறை அமைச்சருமான கே.டி. ராமாராவ் சிரிசில்லா தொகுதியில் வேட்பு மனு தாக்கல் செய்தார். முதல்வரின் மருமகன் ஹரீஷ்ராவ், சித்திப்பேட்டையில் வேட்பு மனு தாக்கல் செய்தார். இந்நிலையில், முதல்வர் சந்திரசேகர ராவ் தனது வேட்பு மனுவில், தன்னிடம் ஒரு கார் கூட சொந்தமாக இல்லை என்று குறிப்பிட்டுள்ளார்.