தவெக மாநாட்டிற்கு நிலம் கொடுத்த விவசாயிகள்..!! விருந்து வைத்து அசத்தும் விஜய்..!! கட்சி அலுவலகத்திற்கு வருகை..!!
தமிழக அரசியலில் பெரும் புயலைக் கிளப்பியிருந்த தவெக மாநாடு, மிகவும் வெற்றிகரமாக விக்கிரவாண்டியில் நடைபெற்று முடிந்தது. இந்நிலையில், விக்கிரவாண்டி மாநாட்டுக்கு நிலம் அளித்தவர்களுக்கு பனையூரில் விருந்து வைத்து கெளரவிக்க விஜய் முடிவு செய்திருப்பதாகவும், இதற்காக அவர்கள் கட்சி அலுவலகத்திற்கு வரவழைக்கப்பட்டுள்ளதாக கூறப்படுகிறது.
தமிழக வெற்றிக் கழகத்தின் முதல் மாநாட்டிற்கு வி.சாலை பகுதியில் சுமார் 230 ஏக்கர் நிலம் ஒதுக்கப்பட்டது. அதேபோல், இந்த மாநாடும் வெற்றிகரமாக நடத்தி முடிக்கப்பட்டுள்ளது. இந்த மாநாட்டுக்கு பல்வேறு நில உரிமையாளர்கள் நிலத்தை வழங்கியிருந்தனர். இதில் விவசாய நிலங்களும் கொடுக்கப்பட்டிருந்தன. இந்நிலையில், மாநாடு முடிந்த பிறகு மீண்டும் விவசாயம் செய்யும் வகையில் நிலத்தை தயார் செய்து கொடுக்கும் வகையில் ஒப்பந்தமும் போடப்பட்டிருந்தது.
இந்நிலையில், தவெக கட்சியின் முதல் மாநாட்டிற்கு நிலம் வழங்கிய நில உரிமையாளர்கள், விவசாயிகளுக்கு அக்கட்சியின் தலைவர் விஜய் விருந்து வைக்கவுள்ளார். விருந்துக்கான ஏற்பாடுகள் பனையூரில் உள்ள தவெக கட்சி அலுவலகத்தில் விறுவிறுப்புடன் நடைபெற்று வருகிறது. இதற்காக நில உரிமையாளர்கள், விவசாயிகள் உள்ளிட்டோர் குடும்பத்துடன் கட்சி அலுவலகத்திற்கு வருகை தந்துள்ளனர். மாநாட்டிற்கு நிலம் வழங்கி உதவி செய்த விவசாயிகளுக்கு நன்றி தெரிவிக்கும் வகையில், இந்த ஏற்பாடுகள் செய்யப்பட்டுள்ளதாக கூறப்படுகிறது.
